Ata o de agora non se sancionou a ningún condutor por circular a gran velocidade nas rúas que, desde o pasado mes de outubro, son 'zona 10' en Pontevedra. O grao de cumprimento desta medida, segundo o goberno municipal, "é moi alto" pero si se rexistraron "excepcións" que o Concello, a través da Policía Local, está disposto a "perseguir".
Por iso, coincidindo coa campaña de Nadal, na que se prevé que haxa máis presenza de xente nas rúas limitadas a 10 km/h, a Policía Local poñerá en marcha unha campaña de control de velocidade que se desenvolverá entre o 29 de novembro e o 5 de decembro.
A edil de Seguridade Cidadá, Eva Vilaverde, explicou que este control será realizado "a calquera hora que a Policía considere oportuno" e, para iso, empregarase un radar láser móbil, os coñecidos como velolaser, e ao mesmo tempo incrementarase a presenza de axentes nas rúas para sancionar aos posibles infractores.
Esta 'zona 10', segundo destacou Vilaverde, foi "moi ben acollida" polos cidadáns que, a diario, transitan por estas rúas a pé e todos asumiron esta "nova convivencia" entre peóns e vehículos. "Non percibimos ningún tipo de diferenza entre o límite anterior de 20 e o novo de 10", engadiu a concelleira do BNG.
Iso si, o Concello notou a "sensación" que existe entre os cidadáns de "certo perigo" que xera o paso de ciclomotores e repartidores por estas rúas limitadas a 10 km/h, polo que iniciou unha campaña informativa entre as empresas e os traballadores.
Aínda que as estatísticas demostran que ningún dos accidentes de tráfico ocorridos en Pontevedra foi provocado por repartidores e que a incidencia dos ciclomotores é "mínima", o goberno municipal mantivo xa varias reunións con compañías que teñen unha ampla frota de repartidores para lembrarlles a nova normativa.
A recepción foi "moi boa", asegurou a responsable de Seguridade Cidadá, tanto entre as empresas como nos traballadores, aos que se lles trasladaron "todas as normas que lles afectan". O Concello, engadiu a edil, é "consciente" de que todos eles forman parte dun sector "importante" para "consolidar" esta 'zona 10' na cidade.
O goberno municipal adiantou que se se "constatan problemas" noutros sectores "tamén se tomarán medidas".
Engade Pontevedra Viva como fonte preferida de Google de balde
Mantente informado coas últimas noticias de actualidade.