O presidente e portavoz municipal do Partido Popular de Pontevedra, Rafa Domínguez, adiantou algunhas das liñas mestras do programa co que aspira a concorrer ás eleccións municipais de 2027.
Entre as súas principais propostas figuran a apertura da cidade cara á ría, a creación dunha cidade deportiva, a construción dunha biblioteca municipal e o traslado de usos universitarios ao centro urbano mediante a reconversión do Hospital Provincial.
Durante un almorzo informativo cos xornalistas locais celebrado este luns, acompañado polas concelleiras Pepa Pardo e Silvia Junco, o líder popular defendeu a necesidade de impulsar unha nova etapa política na cidade. Domínguez considera que o actual modelo de xestión municipal mostra signos de esgotamento e sinalou ámbitos como a mobilidade, o acceso á vivenda, a limpeza urbana, a seguridade ou os servizos sociais como algúns dos principais retos pendentes.
Entre os proxectos que o PP expón para os próximos anos atópanse tamén a recuperación de espazos emblemáticos como a Alameda e o Parque das Palmeiras, a finalización das obras da rúa Alemaña, en Monte Porreiro, e a construción dun pavillón multiusos integrado nunha futura cidade deportiva.
En materia urbanística, Domínguez insistiu na necesidade de elaborar un novo Plan Xeral de Ordenación Municipal, dado que o vixente data de 1989. Segundo explicou, esta actualización permitiría ordenar o crecemento da cidade, axilizar a concesión de licenzas e modernizar os procedementos administrativos. No ámbito residencial, defendeu aumentar a oferta de vivenda mediante a habilitación de novo solo urbanizable e a simplificación de trámites.
O portavoz do PP reiterou a súa intención de reabrir ao tráfico a avenida Raíña Vitoria se alcanza a Alcaldía e anunciou un plan para crear 1.200 novas prazas de aparcadoiro público. Así mesmo, apostou por reforzar os aparcadoiros disuasorios, ampliar as liñas de autobús urbano para mellorar a conexión das parroquias co centro e potenciar tanto os carrís bici como as conexións ferroviarias e de transporte público con Vigo e o seu aeroporto.
No ámbito da seguridade, Domínguez propuxo incrementar os recursos humanos e materiais da Policía Local, aumentar a presenza policial a pé en determinadas zonas e avanzar na construción dunha nova comisaría. Tamén expuxo a creación dunha Unidade de Prevención e Reacción (UPR) e o reforzo dos servizos sociais municipais mediante a ampliación de persoal e axudas a entidades.
O deporte ocupa igualmente un lugar destacado na estratexia do PP. Ademais de novas instalacións e un incremento das axudas a clubs, Domínguez defendeu a gratuidade do uso dos recintos deportivos municipais. Entre as medidas dirixidas á mocidade, expuxo financiar estancias de tres semanas en Reino Unido para alumnado de terceiro e cuarto de ESO.
No apartado cultural, o dirixente popular propuxo a creación dunha gran biblioteca municipal, reclamou a reapertura do Centro de Interpretación das Torres Arcebispais (CITA) e defendeu a rehabilitación integral do Teatro Principal. Tamén apostou pola captación de grandes eventos e por consolidar iniciativas como a Bienal de Pontevedra.
As propostas medioambientais inclúen o impulso ao dragado do río Lérez, investimentos nas redes de saneamento para reducir verteduras e inundacións, a ampliación de zonas verdes e a plantación de 1.200 árbores. Domínguez tamén valorou positivamente a implantación do sistema de recolleita porta a porta, unha medida que, lembrou, figuraba en anteriores programas electorais da súa formación.
No terreo económico e fiscal, o líder popular reiterou o seu compromiso de reducir un 10% o Imposto sobre Bens Inmobles (IBI) e estudar novas rebaixas fiscais para empresas e autónomos. A iso sumou un plan de apoio ao comercio local e medidas orientadas a atraer investimentos e traballadores dixitais. O Camiño Portugués e a promoción do patrimonio histórico e relixioso figuran así mesmo entre os alicerces da súa estratexia turística.
Entre as primeiras medidas que adoptará, se é alcalde de Pontevedra, Rafa Domínguez promete retirar o título de persoa 'non grata' ao expresidente do Goberno, Mariano Rajoy, pola prórroga da concesión de ocupación dos terreos nos que se sitúa a fábrica de Ence.
As propostas presentadas constitúen un primeiro avance do programa co que o Partido Popular buscará recuperar a alcaldía de Pontevedra nas eleccións municipais previstas para maio de 2027.
Engade Pontevedra Viva como fonte preferida de Google de balde
Mantente informado coas últimas noticias de actualidade.