Desde primeira hora desta mañá, as picarañas xa están a traballar en Raíña Vitoria. Comezaron unhas obras que cambiarán por completo a #fisonomía desta avenida que, unha vez terminen, converterase no que o Concello denominou 'skate-praza'.
Os traballos en Raíña Vitoria arrancaron na zona máis próxima ao entroncamento coa rúa Palamios, cuxo pavimento será de formigón puído e terá unha rampla para permitir o acceso de vehículos de emerxencia e garantir a accesibilidade para peóns e ciclistas.
De maneira paralela, unha empresa de cantería da Lama está a elaborar a ducia de pezas de granito que se colocarán sobre a calzada para formar o futuro skate-park urbano.
Serán movibles e desmontables con facilidade, a pesar de que cada unha delas pesa sobre unha tonelada. Irán ancoradas sobre a rúa e, en todo momento, garantirase o tránsito peonil por ambos os lados da avenida, segundo recolle o proxecto.
Para facer máis accesible toda esta contorna, entre o paso de peóns entre o IES Sánchez Cantón e a Alameda e a entrada do aparcamento subterráneo, habilitarase unha plataforma única de case oitocentos metros, elevando a calzada ao nivel das beirarrúas.
O Concello investirá uns 80.000 euros na construción desta nova instalación que, segundo as previsións iniciais, debería estar terminada no prazo dun mes.