Toda a ría de Pontevedra poderá retomar a súa actividade marisqueira. A remisión do episodio de toxinas, que mantiña en xaque ao sector desde abril, provoca que se reabran todas as zonas de extracción.
En total, o Instituto Tecnolóxico para o Control do Medio Mariño (Intecmar) decretou a reapertura de 14 polígonos de bateas e de tres zonas de marisqueo.
A resolución adoptouse despois de que as análises confirmen os signos de mellora que xa se detectaran nas rías de Arousa, Vigo e Pontevedra.
En concreto, na ría de Arousa autorízase o regreso á actividade comercial nos polígonos de mexillón de Ribeira B e C, A Pobra H, B, C e D, Cambados A2, E, A1, C (norte) e C (sur), así como no Grove A.
Pola súa banda, a ría de Vigo recupera a operatividade nos viveiros flotantes de Cangas E e Redondela A e E, mentres que na ría de Pontevedra poderase retomar a extracción nas zonas de marisqueo correspondentes aos sectores III.1, III.2 e IV.1.
Esta evolución favorable vén motivada en gran parte, segundo os técnicos do Intecmar, polas actuais condicións meteorolóxicas, que facilitando unha rápida renovación das augas nas rías e aceleran o proceso de desintoxicación natural dos moluscos.
Deste xeito, a metade de todos os polígonos mexilloeiros da comunidade atópanse xa abertos e en plena actividade comercial.
Ao longo do día de hoxe realizáronse mostras en catro polígonos da ría de Pontevedra, conca que, por mor da lenta renovación de auga, aínda mantén a totalidade das súas bateas pechas, igual que nas rías de Muros-Noia e Ares-Betanzos.
Esta evolución positiva tamén se traslada aos polígonos especializados no cultivo de ostra, onde a estabilidade é case absoluta con tres das catro zonas operativas.
No relativo ao marisqueo, coa apertura da totalidade da ría de Pontevedra, os datos constatan unha recuperación integral dos areais galegos.
Do conxunto de áreas de produción, tan só cinco de 39 zonas mantéñense pechadas na actualidade por precaución sanitaria, o que garante a subministración de bivalvos con totais garantías de calidade e seguridade alimentaria nos mercados.