O presidente da Deputación, Luís López, afirmou que a situación financeira da empresa Pepe Vieira non ten impacto algún na concesión administrativa do restaurante do Museo de Pontevedra, coñecido como Ultramar, cuxa xestión foi recentemente adxudicada de novo á súa empresa.
"Non afecta. Desde o momento que hai un procedimento administrativo, que sacamos dunha concesión do coñecido como Ultramar, que é do Museo de Pontevedra, aí preséntase quen quere e logo, pois hai que cumprir uns requisitos para chegar á fase de adxudicación definitiva e el os cumpliu", manifestou López.
O presidente provincial subliñou que se trata de "un expediente inmaculado o que permite a adxudicación a Pepe Vieira".
López defendeu ademais a traxectoria do cociñeiro, ao que definiu como "un referente dá nosa cociña", e destacou que contar con chefs do seu nivel "nos posiciona como un territorio polo cal moitos nos elixen, pola súa gastronomía".
A empresa Pepe Vieira S.L.U. iniciou un procedemento xudicial para formalizar un acordo de refinanciamento da súa débeda con entidades bancarias.
Tras aproximadamente un ano de negociacións discretas cos bancos, esta semana presentou a documentación no xulgado co obxectivo de dotar de seguridade xurídica ao novo calendario de pagos, polo que se amplía o número de anos reducindo a cantidade das cotas. Mentres se formaliza o plan, todos os seus negocios continúan operando con normalidade.
Este grupo empresarial experimentou un notable crecemento nos últimos anos. Baixo o paraugas de Pepe Vieira S.L.U. operan o restaurante gastronómico en Raxó con dúas estrelas Michelin, o hotel de natureza anexo inaugurado en 2023, o restaurante Ultramar no Museo, a churrasquería Varela no centro de Pontevedra e o Pazo da Buzaca, en Moraña, destinado principalmente á celebración de eventos.
Estes dous últimos proxectos rexistraron sobrecustos que obrigaron a recorrer a financiamento bancario a curto prazo.