O Concello de Meaño potencia un ano máis o seu compromiso coa loita pola igualdade de xénero a través dunha completa programación con motivo do 8 de marzo, Día Internacional da Muller.
O goberno local deseñou un calendario de actividades que abrangue dende actos institucionais e reivindicativos ata momentos para a convivencia social e o deporte, co obxectivo de dar visibilidade ao papel fundamental da muller na sociedade e, especialmente, no ámbito rural.
O programa dará comezo oficialmente o venres 6 de marzo coa vertente máis institucional.
A Praza do Concello será o escenario, ás 12.00 horas, da lectura pública do manifesto do Día da Muller.
Nesta ocasión, a voz da reivindicación recaerá na psicóloga do Centro de Información á Muller (CIM) da Mancomunidade do Salnés, quen será a encargada de pór de relevo os retos pendentes e os logros acadados en materia de igualdade.
Un dos eventos máis consolidados do calendario municipal é a Cea de Confraternidade de Mulleres, que este ano celebra a súa décimo sétima edición.
A cita terá lugar o sábado 7 de marzo, a partir das 22.00 horas, no Restaurante Casa Rodiño.
Esta cea, que busca fomentar os vínculos entre as veciñas do municipio, contará coa animación musical do Dúo Prisma e incluirá o tradicional sorteo de agasallos entre todas as asistentes.
As persoas interesadas en participar poden retirar os seus tickets, por un prezo de 30 euros, nas oficinas municipais a partir deste mesmo xoves, 26 de febreiro.
O propio domingo 8 de marzo, a actividade trasladarase ao Centro Social de Dena. A partir das 18.00 horas, o recinto acollerá unha xornada que mestura a ilusión co recoñecemento histórico.
O Mago Charly Braun será o protagonista do apartado cultural co seu espectáculo "Maxia en igualdade: O imposible", unha proposta dirixida a todos os públicos con entrada de balde.
O momento máis emotivo da tarde chegará co acto de homenaxe ás mulleres de Meaño nadas no ano 1961, un recoñecemento á traxectoria vital de toda unha xeración de veciñas.
De xeito complementario, procederase á presentación dunha exposición fotográfica que recolle instantes e memorias do colectivo feminino no municipio.
A programación estenderase ata a seguinte fin de semana coa celebración da Andaina da Muller o domingo 15 de marzo.
Trátase dunha ruta circular de dificultade media que terá como punto de saída e de chegada a Praza de Simes.
A marcha comezará ás 10.00 horas e as participantes contarán con servizo de avituallamento para repoñer forzas durante o percorrido.