Coa intención de revisar o estado de conservación en que se atopan as áreas infantís de xogo no municipio, a concellería de Servizos Urbanos básicos, que dirixe Xaquín Moreda, está a realizar unha análise de corenta espazos, con 26 diagnósticos xa efectuados, atendendo ás diferentes normativas reguladoras de seguridade.
Durante esta supervisión avalíase desde a capacidade amortecedora de impactos da superficie ata posibles deficiencias nos diferentes elementos de xogo.
Esta semana xa se iniciaban os primeiros traballos de reparación en Mollavao e en Ponte Boleira. Por este motivo, permanecerán pechados durante uns días ata que finalicen as obras.
No caso de Ponte Boleira realizarase unha limpeza xeral, con reparación do pavimento de céspede artificial; reparación e pintado do valo que rodea o espazo; arranxo integral de diversos xogos; e pintado. O orzamento sitúase en 15.581 euros.
No parque infantil de Mollavao, que se atopa na Rúa Fonte Santa, tamén se executará unha limpeza xeral con desinfección. Repararanse tamén varios xogos e pintarase o valo de madeira; ademais de realizar cambios de tapóns, parafusos e outros elementos que se atopen deteriorados. O orzamento das obras é de 5.560 euros.
Por outra banda, esta concellería en coordinación con Alberto Oubiña, concelleiro responsable do barrio de Monte Porreiro, instalaba esta semana un bambán adaptado no espazo infantil que se atopa situado no Parque de Europa. Residentes na zona demandaban esta incorporación desde hai tempo.