A cidade de Pontevedra celebrará a próxima fin de semana, os días 23, 24 e 25 de setembro, a Costa Atlántica MTB Tour, unha competición por etapas de bicicleta de montaña que carrexará restricións de tráfico.
Os participantes na proba gozarán de 3 etapas: unha crono nocturna de catro quilómetros polo centro histórico da cidade e dúas etapas maratón por distintos concellos, con saída e chegada, tamén, na Boa Vila. A proba ten un formato "challenge", o que quere dicir que cada etapa dispútase de forma independente.
Terá unha asistencia prevista de máis de 200 participantes.
A saída o venres será de catro en catro desde a praza de España. As outras dúas etapas percorrerán distintos concellos, con saída e chegada na praza da Ferrería.
A Policía Local de Pontevedra informou que o venres 23 de setembro, de 19:30 a 22:30 horas (aproximadamente) non se poderá acceder nin saír con vehículo á zona afectada pola proba deportiva.
O acceso e saída dos inmobles afectados directamente polo circuíto estará permitido para os residentes a pé e supervisado por persoal da organización.
O tramo das Avenidas de Uruguai e Buenos Aires comprendido entre as pontes das Correntes e o de Santiago permanecerá pechado ao tráfico en ambos os sentidos durante a celebración da proba. A circulación de vehículos entre as avenidas sinaladas efectuarase pola Avenida Domingo Fontán e rúa Xoan Manuel Pintos.