Pontevedra prepara unha semana cargada de tradición galega con preparativos para celebrar a Romaría de San Sebastián, que culminará o sábado 17 de xaneiro cunha xornada festiva e integradora.
O programa de actividades comeza o luns 12 na Casa da Luz cun curso de afinación e empalletado para gaita galega, impartido por Juan Iglesias Esperón.
O martes será a quenda do tradicional traxe galego con Ana Nogareda, mentres que o mércores Lola de Ribeira ensinará técnica vocal e canto tradicional.
O xoves, Miguel Fraguas guiará un obradoiro de percusión na Casa da Luz, e o venres Xandre Outeiro dará clases de baile tradicional no Mercado de Abastos.
Estes cursos gratuítos que xa rexistran gran demanda e mesmo algúns carecen de prazas: "Estamos poñendo quendas auxiliares, a xente é moi insistente. É sinal de que temos unha boa saúde do folclore nun momento marabilloso", sinalou Miguel Fraguas, da Asociación Pola Vila, colectivo que promove esta iniciativa co Concello de Pontevedra.
Todos os cursos son de balde e é necesario apuntarse no correo [email protected], indicando nome, apelidos e curso.
O día grande, sábado 17, Pontevedra quere converterse no centro do folclore galego.
Desde as 12:00, un pasacalles "Orgullo Gaiteirx", que sairá da Praza de España, mobilizará grupos como Polavila, Celme, Gaiteiros das Rías Baixas, As Piruchas, Fervellos do Pío, Os Alegres de Pontevedra, Os Lerenses, e a Asociación do Traxe Tradicional.
Á chegada ao Mercado de Abastos celebrarase o pregón con Maruxa dos Rosales, recoñecida folclorista que falará da tradición das romarías.
Durante o día haberá feira de artesanía e mostra de palilleiras, xunto a unha ruta gastronómica protagonizada por produtos tradicionais: "Pan de millo dos tempos da fame, petote, e filloas para repoñer enerxías", destacou Sagrario Pérez Alvela, presidenta de Pola Vila.
O programa musical e folclórico inclúe sesión vermú coa charanga Boavila, actuacións das pandeireteiras de Fentos e Frouma, O Son das Corbaceiras, O Son do Peto, Donaire, as pandeireteiras do Gorgullón, Celme, Morenos Peludos, o concerto de Comando Curuxás e a foliada aberta para pechar a xornada.
Miguel Fraguas subliña a importancia da participación: "Convidamos os pontevedreses a sumarse aos obradoiros, á romaría, ao desfile e a todas as actividades. Todos os que poidan, que se vistan co traxe tradicional e que aproveiten esta festa única".
Demetrio Gómez, concelleiro de Cultura, remarcou o carácter comunitario do evento e convidou a toda a cidadanía a participar nesa xornada.
"É a primeira vez que se fai neste formato de Orgullo Galego en Pontevedra", apuntan desde Pola Vila coa intención de recuperar o sentido das romarías tradicionais.