Xa hai vía libre para construír en Pontevedra a última rúa que quedaba por habilitar na coñecida como unidade de actuación 18, o polígono urbanístico comprendido entre as rúas Eduardo Pondal, Joaquín Costa e Doce de Novembro.
Trátase da Rúa Barreiriñas, que unirá Eduardo Pondal con Doce de Novembro, segundo anunciou este xoves o alcalde de Pontevedra, Miguel Anxo Fernández Lores.
Este novo viario executarao a xunta de compensación que promoveu toda esta urbanización.
Será unha rúa peonil e con plataforma única de doce metros de ancho e 114 de longo. A súa apertura custará uns 250.000 euros e terá un prazo de execución de cinco meses.
A esta vía, que terá o seu pavimento en formigón, poderán acceder os residentes nos novos edificios que se están construíndo e que teñan alí os seus garaxes.
A denominación desta rúa como Rúa Barreiriñas foi aprobada hai máis de quince anos.
Foi cando comezou o desenvolvemento de todo este proxecto urbanístico, momento no que se optou por recuperar topónimos tradicionais en todas as rúas abertas neste ámbito.
AMPLIACIÓN DO PRAZO DE REFORMA DO CONSERVATORIO
A Xunta de Goberno deste xoves aprobou tamén unha ampliación do prazo de execución da reforma do antigo conservatorio da rúa Alfonso XIII, cuxa obra, que comezou en setembro do ano pasado, debería concluír o próximo 11 de marzo.
A falta de certos materiais, a demora na tramitación de certos permisos e a complexidade na instalación das estadas son algunhas das razóns polas que a construtora Gómez Crespo solicitou cinco meses máis de prazo.
Este permiso, que foi concedido, sitúa agora o final desta obra no 11 de agosto.