O presidente da Xunta de Galicia, Alfonso Rueda, expresou o seu desexo de que "haxa xustiza" e que esa xustiza "sexa rápida" con respecto á denuncia de agresión sexual presentada contra o conselleiro de Mar, Alfonso Villares.
En declaracións aos xornalistas en Pontevedra, Rueda recoñeceu que "non son momentos fáciles" e neles hai que manter a "firmeza".
"Agardo que se faga xustiza canto antes e oxalá poidamos recuperalo para a vida pública", engadiu.
O titular da Xunta manifestou o seu "máximo respecto" a calquera decisión xudicial e puxo en valor a decisión de Villares de dimitir como conselleiro ao coñecer a denuncia.
Lembrou que Villares, como membro do goberno galego, tiña a condición de aforado, polo que tería que ser investigado polo Tribunal Superior de Xustiza de Galicia, "e decidiu renunciar ao seu aforamento e ser enxuizado por un xulgado ordinario".
Rueda entende que o xa ex conselleiro de Mar tomou esa decisión "pensando que é a mellor maneira de acreditar a súa inocencia" e, ao mesmo tempo, "preservar a credibilidade das institucións".
"Creo que é unha mostra da súa firmeza e de convencemento na súa inocencia", sentenciou Alfonso Rueda.
O presidente galego concluíu afirmando que a administración "ten que seguir" e lembrou que "mañá mesmo" tomará posesión como nova responsable da Consellería de Mar Marta Villaverde, até o de agora directora xeral de Desenvolvemento Pesqueiro.