Pontevedra acollerá o próximo 20 de xuño a segunda edición da xornada solidaria 'Pontevedra cos 5 sentidos'.
A proposta exponse este ano como unha forma de coidar ás coidadoras e persoas non profesionais ás que lles cambia a vida e que necesitan "tomarse un respiro e poder desconectar", explicou a concelleira de Benestar Social, Anabel Gulías, durante a presentación desta iniciativa.
O diñeiro recadado, indicou, irá destinado ao desenvolvemento do proxecto 'Coidamos aos coidadores' de Amencer-Aspace e da AECC, así como para persoas con discapacidade ou que están en proceso de enfermidade e que demostran que Pontevedra é "unha cidade diversa, accesible e inclusiva, na que todas e todos contamos, sexan cales sexan as nosas capacidades".
A proposta, lúdica, cultural e solidaria desenvolverase a través dunha ruta inmersiva por toda a cidade que partirá da Praza de España a partir das 10:30 horas.
Desde aí, as persoas participantes dividiranse en pequenos grupos e pararán en lugares como o Mercado, a Casa da Luz, a Casa das Campás, as prazas da Peregrina, a Ferrería e o Campiño de Santa María, onde terminará a xornada con música en directo co grupo Gold&Colt.
Os talleres estarán deseñados para estimular a vista, o oído, o olfacto, o gusto e o tacto a través da realidade virtual, que se unirá coa artesanía ou a memoria dos oficios tradicionais.
Participarán as redeiras de Atalaia cun expositor de artesanía tradicional, redes e materiais; as mariscadoras de Carril, coa actividade 'O mar no teu corpo: memoria, arte e un mural colectivo', e un bateeiro que impartirá un taller práctico de atado de cordas e explicará como é o cultivo de mexillóns.
Tamén haberá unha parada na que se falará sobre a contaminación mariña, combinada cunha exposición táctil sobre praias limpas; unha cata a cegas de marisco tradicional, unha demostración de cociña en directo e unha experiencia con lentes de 360 graos para explorar o fondo mariño.
Cada experiencia terá unha duración aproximada de 40 minutos e cada grupo participará en tres delas.
O prezo da inscrición é de 15 euros por adulto, 6 por neno de 6 a 12 anos e 0 euros os menores desa franxa de idade. Os usuarios de Amencer poden levar un acompañante de forma gratuíta.
Para poder participar habilitaron a páxina web de Amencer, onde calquera persoa pode facer un donativo voluntario e sen contía mínima. As inscricións están abertas até cubrir prazas.
Xunto a Anabel Gulías estiveron o presidente de Amencer-Aspace, Carlos Godoy; a presidenta da Asocación Española Contra o Cancro en Pontevedra, Ana García, e a CEO de Galiwonders, Sabela Gippini.