De punta a punta de España por unha causa solidaria.
Un veciño de Valencia, José Luís Martínez, percorrerá un total de 1.016 quilómetros en bicicleta para recadar fondos contra o cancro.
É a distancia que separa Ayora e Sanxenxo.
Esta iniciativa, explica, xurdiu por mor da súa amiga Sandra Patiño, veciña de Noalla e enferma de cancro, como unha forma de animala na súa loita contra a enfermidade.
"A pesar de que ela está casada cun veciño de Ayora, sempre leva a Noalla no seu corazón e sempre que pode vaise a Galicia. Por iso ocorréuseme esta idea e a ela iluminóuselle a mirada cando llo dixen. Só por iso xa merece a pena", sinalou antes de iniciar a súa ruta este venres desde a Comunidade Valenciana.
"Sempre me gustou a bicicleta e encarguei unha camisola que leva o nome de Sandriña e as bandeiras de Ayora e Sanxenxo", engade.
Desde a parte galega, está previsto que o alcalde de Sanxenxo, Telmo Martín, acompañado de membros do goberno local, reciban a José Luís Martínez á súa chegada ás Rías Baixas, prevista para o vindeiro sábado 6 de xuño.
As persoas que queiran colaborar con esta iniciativa poden facelo a través do número de conta ES19 3058 0990 2827 6573 9043.
"É unha conta exclusiva creada para esta ruta e irá integramente destinado á Asociación contra o Cancro", asegura José Luís Martínez.