O municipio de Pontevedra conta con tres montes periurbanos que, grazas ao labor de posta en valor dos últimos anos, se foron recuperando como espazos naturais de gran riqueza ambiental.
Unha parte fundamental destas contornas son os parques forestais, un grande anel verde de Pontevedra composto polas áreas da Fracha, A Tomba e Pontillón de Castro.
Turismo de Pontevedra convídanos a percorrer estas tres contornas naturais a través de roteiros para a práctica do sendeirismo ou a bicicleta, ademais de áreas recreativas e impresionantes miradoiros para ver a cidade e as paisaxes dos arredores dende as alturas.
PARQUE FORESTAL DA FRACHA
Este parque forestal está situado no monte de A Fracha, na parroquia pontevedresa de Marcón, e tamén se estende polas parroquias de Tomeza e A Canicouva.
O monte, asentado sobre o macizo granítico central da provincia de Pontevedra, presenta unha topografía heteroxénea, con altitudes comprendidas entre os 200 e os 542 metros do seu cumio.
As dúas rutas MTB (bicicleta de montaña) e cinco rutas de sendeirismo habilitadas permiten percorrer todo o Parque Forestal da Fracha e descubrir unha chea de curiosas formacións rochosas e numerosos regatos estacionais, que mudan esta asombrosa paisaxe segundo as distintas estacións do ano.
A masa forestal está dominada pola matogueira (toxos, xestas, uces), piñeirais, eucaliptais e as recentes plantacións de frondosas, fundamentalmente carballos, castiñeiros e bidueiros, en parcelas antigamente ocupadas por especies invasoras.
Os catro miradoiros cos que conta este parque forestal (Outeiro Navío, Rega Pereira, Couto das Forcadas e Legua da Chan) ofrecen unhas espectaculares vistas panorámicas da súa contorna e das rías de Pontevedra e Vigo.
Xunto a eles atópanse as tres áreas de lecer habilitadas, dotadas de sendas accesibles, mesas e bancos que permiten pasar momentos de ocio ou de descanso ao visitante.
Como chegar?
En coche pódese acceder desde o polígono industrial do Campiño (Pontevedra) ou A Reigosa (Ponte Caldelas).
A pé pode facerse a ruta desde as parroquias da Canicouva, Tomeza e Marcón.
PARQUE FORESTAL DA TOMBA
Enclavado na parroquia pontevedresa de Campañó, este espazo forestal periurbano abrangue unha superficie aproximada de 80 hectáreas e pode percorrerse ao longo de aproximadamente 6,5 km a través de sendas forestais.
No Parque Forestal da Tomba, levouse a cabo unha importante actuación, eliminando unha gran superficie de especies invasoras, como acacias e eucaliptos, e plantáronse máis de 20.000 exemplares de frondosas para conseguir unha gran masa de vexetación autóctona.
Grazas ás distintas sendas que percorren todo o parque, o visitante poderá descubrir diferentes masas forestais, entre as que destacan os piñeirais, as carballeiras, os soutos e mesmo un oliveiral de plantación recente.
Ademais de recursos líticos entre os que destacan unha fermosa laxe cun singular conxunto de petróglifos, así como diferentes formacións rochosas con nomes tan curiosos como: Pedra Redonda, Pedra da Campá e Cadeira da Raíña.
Os dous miradoiros acondicionados cos que conta o parque (Torreiro e Chozo do Pinar do Rei) ofrecen unhas impresionantes vistas panorámicas da cidade de Pontevedra e dos montes e parroquias que a rodean, do curso do río Lérez e do Espazo Natural de Interese Local (ENIL) da Xunqueira.
O camiño central do parque formaba parte do antigo Camiño do Cura, que partía da Reitoral de Campañó e chegaba ata o Convento de Poio.
Como chegar?
En coche pódese acceder ao Parque Forestal da Tomba desde a rotonda de Cabaleiro (Campañó) tomando o desvío da VG-4.8 ou desde o Polígono do Vao. O estacionamento principal está situado xunto ao miradoiro do Torreiro, punto dende o que se pode emprender a ruta a pé para visitar o parque.
Desde Pontevedra, pódese chegar a pé desde diversos puntos. Recoméndase o ascenso desde a Ponte do Burgo, pasando pola Xunqueira da Gándara, o vial de servizo da autoestrada e os núcleos do Ribeiro e O Casal de Rei (Campañó), que deixará á persoa camiñante na zona baixa do Parque.
PARQUE FORESTAL DO PONTILLÓN DO CASTRO
Localizado na parroquia pontevedresa de Verducido, o encoro de Pontillón do Castro foi construído a mediados do pasado século para fornecer dende entón á cidade de Pontevedra.
Conta con instalacións deportivas que dan soporte á práctica de disciplinas acuáticas, especialmente o piragüismo. O percorrido polo Parque Forestal do Pontillón do Castro parte deste Centro de Piragüismo David Cal, nunha ruta circular, co punto de saída e de chegada situado no aparcadoiro.
A senda percorre no primeiro tramo un sendeiro empedrado coñecido como Camiño do Loural, que é a parte do traxecto con maior pendente. Durante a subida pasamos por unha pequena carballeira que medra entre os restos de pedra dunha posible antiga canteira.
Ao chegar ao alto, desde o Outeiro da Lumieira, de 466 metros de altitude, poderemos gozar dunhas vistas panorámicas que abranguen as rías de Vigo, Pontevedra e Arousa, e descubrir o petróglifo existente nos rochedos da zona.
Na baixada atravesaremos vieiros tradicionais, como o Camiño empedrado de Abilleira e o Camiño das Pesoeiras. A parte final da senda introdúcenos no val e lévanos a carón dos muíños instalados na beira do río Rexedoiro.
A vexetación que nos acompaña durante todo o percorrido é unha masa forestal de piñeiro e eucalipto, que convive con algún exemplar de carballo de bo tamaño xunto con especies típicas do sotobosque, como sanguiño, toxo, xesta e silva.
Tamén pasamos por unha braña e outras zonas húmidas con curiosas especies de fentos, como o fento real, o fento macho ou o fento peite.
Como chegar?
En coche pódese acceder ao Parque Forestal do Pontillón do Castro desde a N-550, tomando o desvío á altura de San Amaro (Barro) ou desde outras localizacións pasando polo interior da Parroquia de Verducido (Pontevedra).
A pé é recomendable a ruta desde a Igrexa de San Martiño de Verducido.
