Durante a noite do luns 23 ao martes 24 de xuño, con motivo da celebración do San Xoán, un total de 152 fogueiras iluminarán todas as parroquias e o centro de Pontevedra.
Así o confirmou este xoves a portavoz do Goberno local e responsable de Protección Cidadá, Eva Vilaverde, que fixo balance das comunicacións recibidas no Concello de Pontevedra sobre as fogueiras desa noite.
Todas as solicitudes están tramitadas e autorizadas e están agora en coñecemento da Policía Local e os bombeiros de Pontevedra para que revisen as condicións de seguridade.
O número deste ano é "elevadísimo" e, segundo Eva Vilaverde, "quere dicir que a xente quere gozar do San Xoán"
Haberá fogueiras para espantar o meigallo nesa noite máxica en todas as parroquias de Pontevedra e tamén no centro da cidade.
Ademais das fogueiras que prenderán particulares e comunidades de veciños, hai sete asociacións que se animaron a organizar este ano a súa celebración.
Son, segundo revelou Eva Vilaverde, as asociacións de veciños de Eduardo Pondal, Salcedo Norte, O Mirador de Monte Porreiro, A Piolla e Ponte Muiños, ademais das entidades Casino Mercantil e Industrial de Pontevedra e Amigos do Camiño Portugués.