O Concello de Poio reforzará durante as festas de San Xoán as iniciativas destinadas a mellorar a inclusión e a accesibilidade, con especial atención ás persoas con sensibilidade sensorial. O obxectivo é adaptar a programación festiva para que poida ser gozada por toda a cidadanía nunha contorna máis cómoda e respectuosa.
Unha das principais novidades será a ampliación dos períodos sen ruído nas atraccións instaladas con motivo da feira. Por terceiro ano consecutivo, as actividades funcionarán todos os días até as 21:30 horas sen música nin efectos sonoros adicionais, unha medida pensada especialmente para facilitar a participación de persoas con Trastorno do Espectro Autista (TEA) e outras condicións relacionadas coa hipersensibilidad auditiva.
O concelleiro de Festexos, Fran Dasilva, explicou que os sons intensos poden supor unha dificultade para algunhas persoas, converténdose nunha barreira que limita o seu acceso a espazos de lecer habituais.
O programa festivo tamén incorpora unha planificación específica para os fogos de ruído, co fin de informar con antelación a quen poidan verse afectados por estes estímulos, así como favorecer o benestar dos animais.
Os avisos pirotécnicos terán lugar o 22 de xuño ás 20:00 horas, coincidindo co inicio oficial das celebracións, a lectura do pregón e a entrega de premios.
O 23 de xuño realizaranse dúas sesións: unha ás 12:00 horas e outra ás 23:45 horas, antes do aceso da fogueira de San Xoán. Posteriormente, haberá novos lanzamentos os días 24, 25 e 26 de xuño ás 13:00 horas. Estes espectáculos terán unha duración aproximada de 15 minutos.
Ademais, durante a madrugada do 26 de xuño, ás 00:00 horas, a contorna da Seca acollerá un espectáculo de fogos de lucería, cunha duración prevista duns 20 minutos.
Xunto a estas medidas, o Concello manterá as celebracións tradicionais destas datas. A Baixada do Santo desde San Martiño celebrarase o 24 de xuño entre as 11:00 e as 11:30 horas, acompañada polas alboradas de Vides Novas e por fogos. Ao día seguinte, o 25 de xuño, terá lugar a Subida do Santo, prevista entre as 14:00 e as 14:30 horas.
Desde o goberno local destacan que estas actuacións forman parte dunha aposta por avanzar cara a un modelo de festas máis abertas, no que as necesidades de diferentes colectivos sexan tidas en conta. A intención é garantir que o lecer e a participación nos actos festivos poidan desenvolverse en igualdade de condicións para toda a veciñanza.