Os pontevedreses espantaron todos os 'meigallos' posibles durante a noite máis máxica do ano, a das fogueiras de San Xoán.
Na Boa Vila autorizáronse 153 cacharelas, unha decena delas organizadas por entidades veciñais e sociais.
Destacou por numerosa a proposta da Asociación Veciñal A Pedreira nos terreos da antiga Tafisa, ao bordo do río, á que se achegaron moitos veciños para gozar de sardiñas, chourizos á brasa, a música dunha foliada e por suposto, do lume purificador da fogueira de San Xoán.
Tamén organizaban fogueiras a Cultural de Mourente, Cultural da Piolla, Amigos do Camiño Portugués, O Mirador de Monte Porreiro, Casino Mercantil, Asociación Recreativa de Xeve, Asociación de Veciños de Ponte Muíños, Salcedo Norte e a Comisión de Festas de San Cibrán de Tomeza.
POIO, UN DOS GRANDES PUNTOS DE ATENCIÓN DA COMARCA
Como cada ano a proposta do Concello de Poio na zona da Seca foi un dos grandes puntos de atención para difrutar das fogueiras, cunha gran cacharela que completaba a tradicional sardiñada. Todo iso amenizado pola verbena de Los Players, e é que Poio atópase en plenas festas patronais.
No seu caso o goberno local autorizou un total de 200 fogueiras en todo o municipio.
SANXENXO, NAS PRAIAS
No caso de Sanxenxo tramitáronse un total de 266 permisos para a celebración de cacharelas. Ata 23 delas tiveron lugar en lugares públicos, con especial atención nas praias.
Así Caneliñas foi escenario de dez lumes, seis realizáronse en Silgar, un na Panadeira e outras seis tiveron como lugar outros espazos públicos.
'FESTA RACHADA' EN CALDAS
Hoguera, sardiñada, música e malabares era a proposta tamén de Caldas de Reis, unha das máis completas da zona tras asumir o Concello a organización da celebración que impulsaba a veciñanza e os hostaleiros da contorna do río Bermaña.
Ademais dun taller sobre as herbas de San Xoán, a xornada contaba con concerto do grupo 'Abril' previo ao aceso, o espectáculo de lume 'Fire performance' con malabares a carago da compañía Asacocirco e outro concerto tras a gran fogueira a cargo de 'Catuxa Salom', ademais dunha sardiñada popular.