Dez meses despois de que Santa Clara pasase a ser público, confirmouse o que era un secreto a voces. O antigo convento será cedido ao Museo de Pontevedra. "É un paso definitivo e firme", segundo os seus responsables. Será o sétimo edificio do seu complexo artístico.
"O Museo precisaba unha ampliación e ás veces pasan cousas marabillosas na vida", destacou a presidenta da Deputación, Carmela Silva, que apuntou que "non hai espazo mellor que este" para ampliar "o museo máis importante que temos en Galicia".
O Concello de Pontevedra, como propietario do cenobio, cederá o inmoble á institución provincial mediante a firma dun convenio que, entre outras cousas, establecerá que os xardíns e a horta do convento manteñan o seu uso público e estean abertos á cidadanía.
A intención é "permeabilizar" toda esta zona e crear accesos a todo este ámbito desde Barcelos e Santa Clara. A este respecto, o goberno municipal negocia co Arcebispado a compra do edificio das misións pontificias, anexo ao propio convento.
A antiga capela, que desde hai meses veuse usando como recinto cultural, reconverterase nun salón de actos. "Queremos que sexa un espazo público aberto á xente", explicou Silva, acollendo todo tipo de actividades alleas aos usos museísticos.
UN CONCURSO DE IDEAS PARA UNHA REHABILITACIÓN "AMBICIOSA"
Un dos primeiros pasos que se abordará, tras a firma do convenio de cesión, será a convocatoria dun concurso internacional de ideas, aberto a arquitectos de todo o mundo, para escoller a proposta máis adecuada para afrontar a custosa rehabilitación do convento.
"Seremos moi ambiciosos con esta rehabilitación", sostiveron Carmela Silva e César Mosquera, responsable político do Museo, xa que o obxectivo é que se converta nun referente "que nos sitúe no mundo" en materia de recuperación do patrimonio histórico.
Tras apuntar que "Santa Clara o merece", Mosquera avanzou que a Deputación "fará un esforzo" para sufragar este proxecto, aínda que entende que na recuperación deste "espazo único" na provincia deben colaborar tamén a Xunta e o Ministerio de Cultura, entre outros.
De maneira paralela a este concurso de ideas, o propio Museo comezará a traballar no plan de usos e no proxecto museístico para Santa Clara que, segundo o seu director, Xosé Manuel Rey, deberá buscar o "fío condutor" que o integre co resto de edificios e coleccións.
A este respecto, o director sostivo que o plan para Santa Clara trazarase en base a tres criterios, un deles a posibilidade de expoñer ás público obras que, por falta de espazo, en están almacenadas nas salas de reserva "e que son moi relevantes".
Santa Clara será o espazo que o Museo empregará para a xestión integral de toda a súa colección arqueolóxica e reservará un espazo para "entender a evolución da cidade nos últimos 750 anos" a partir dos achados arqueolóxicos e a documentación que se foi atopando.
LORES, UN "NENO CON ZAPATOS NOVOS"
Como un "neno con zapatos novos" está, segundo el mesmo asegurou, o alcalde de Pontevedra, Miguel Anxo Fernández Lores, que subliñou que o Concello colaborará "dentro do que consideremos razoable" na rehabilitación de todo o convento.
Fernández Lores destacou especialmente a importancia que supuxo a integración de todo o ámbito de Santa Clara ao armazón urbano da cidade, permitindo que os cidadáns descubrisen un espazo "descoñecido durante 750 anos".
A pesar da súa cesión ao Museo, o rexedor garantiu que o Concello "seguirá tomando parte de todas as decisións que se tomen no futuro" con respecto a un espazo, o de Santa Clara, que xa forma parte do patrimonio de todos os pontevedreses.
Engade Pontevedra Viva como fonte preferida de Google de balde
Mantente informado coas últimas noticias de actualidade.