A Real Basílica de Santa María A Maior acolleu este xoves o acto de inauguración do resultado das obras realizadas nos últimos noves meses neste templo pontevedrés, que é ben de interese cultural desde o ano 1931.
Na véspera do día grande da parroquia coa festividade da Asunción, celebrouse especialmente a nova imaxe que ofrece a fachada principal, aínda que a obra tamén incluíu as cubertas e cresterías.
Concretamente, renovouse a cuberta da ábsida e da vertente anexa á nave sur con placas de fibrocemento e tella cerámica, resolvendo tamén os sistemas de evacuación e mellorando a seguridade do paso das escaleiras de acceso ás cubertas.
Ademais, con respecto ás fachadas, efectuouse un picado superficial de xuntas de morteiro de cemento e posterior encintado mediante morteiro de cal e unha limpeza dos muros de pedra con tratamento herbicida e fungicida.
Un dos aspectos máis comentados é que a fachada occidental de Cornelius de Holanda dotouse dun sistema de protección co que se espera minimizar a presenza de aves que poidan afectar á súa conservación.
A conselleira de Vivenda e Planificación de Infraestruturas, María Martínez Allegue, participou nesta inauguración substituíndo ao presidente da Xunta, Alfonso Rueda quen non puido asistir por "causas de forza maior", segundo explicaron, pola onda de incendios que sofre Galicia.
Allegue destacou que a basílica é "parte da identidade de Pontevedra" e enxalzouna como "unha gran xoia arquitectónica, si non a mellor, da cidade", celebrando que "hoxe recupera o seu esplendor".
A Xunta levou a cabo esta "obra necesaria" que supuxo un investimento autonómico de 550.000 euros e que completa as efectuadas en 2020 e 2021, cando se interveu na cuberta da nave central e lateral e na estabilización das vidreiras, sumando un orzamento global que supera os 800.000 euros.
Pola súa banda o alcalde de Pontevedra, Miguel Anxo Fernández Lores tamén enxalzou o "poñer en valor o patrimonio histórico, arquitectónico e natural" da cidade polo que agradeceu á Xunta o seu esforzo por "conservar o patrimonio, que é fundamental".
"As cidades constrúense ao longo dos séculos e as administracións teñen a obrigación de conservar e mellorar o seu patrimonio", dixo o alcalde.
Lores aproveitou a ocasión para anunciar que o Concello renovará a iluminación exterior do templo nos próximos meses.
Ademais, neste acto interviñeron as arquitectas Carlota López Brea e Dolores Tobío, que explicaron algúns detalles técnicos da actuación levada a cabo e tamén tomaron a palabra para agradecer a restauración da basílica, a presidenta da Asociación de Vecinos Santa María Pilar Señoráns, e o párroco, Francisco Javier Porro.
