Sanxenxo estrea o Centro da Cultura Gastronómica Rías Baixas no histórico Pazo de Quintáns

Sanxenxo sumou este sábado un novo atractivo turístico que combina patrimonio, paisaxe e gastronomía: o Centro da Cultura Gastronómica Rías Baixas, situado no Pazo de Quintáns, na parroquia de Noalla.

Este espazo, que tamén albergará a sede da Concellaría de Turismo, preséntase como un recurso único en Galicia para gozar da riqueza da cociña local e da contorna natural.

A inauguración contou coa presenza do alcalde Telmo Martín, acompañado polos presidentes da Xunta, Alfonso Rueda, e da Deputación, Luís López, así como outros alcaldes da comarca, membros do goberno, representantes do sector turístico e colectivos de Noalla.

Os invitados percorreron as distintas estancias temáticas do centro, que combinan paneis interactivos, experiencias visuais e didácticas para mostrar a orixe dos produtos da horta e do mar, a evolución da cociña galega e a beleza da paisaxe local.

O percorrido concluíu cun showcooking e cata de viños a cargo dos chefs Pepe Vieira e Miguel Besada na sala de degustación.

Posteriormente, os asistentes gozaron dun paseo polo xardín até chegar ao novo edificio "As Salinas", que rende homenaxe á comarca do Salnés e ás antigas salinas de Noalla, onde puideron saborear unha degustación de alta cociña asinada por un chef con dúas Estrellas Michelín.

Durante a súa intervención, o alcalde lembrou que o Concello adquiriu o Pazo en 2005 por 1,2 millóns de euros e que, tras ser declarado Ben de Interese Cultural en 2017, foi obxecto dunha profunda rehabilitación en 2019 con fondos propios, europeos e estatais.

"Este Centro queremos que sexa un símbolo da Galicia Calidade, un embaixador da gastronomía das Rías Baixas, un espacio único que merece Noalla e un novo recurso turístico co que conta Sanxenxo", subliñou.

Pola súa banda, o presidente da Deputación destacou "a complexidade do proxecto" e sinalou que si as Rías Baixas "están de moda e en parte culpa de Sanxenxo e do seu alcalde".

Na mesma liña, o presidente da Xunta, Alfonso Rueda, cualificou o centro como un "expoñente perfecto de Galicia Calidade" e asegurou o apoio da Xunta, resaltando a importancia de recuperar patrimonio e potenciar o turismo gastronómico, un segmento cun gasto medio superior ao da media.

Rueda tamén destacou a boa saúde turística de Galicia, lembrando que "non sobra ninguén" e apostando por que os visitantes cheguen "cada vez máis repartidos durante ou ano".

Até outubro, a comunidade rexistrou máis de 6,6 millóns de viaxeiros, un 2,7 % máis que o ano anterior, mentres que os peregrinos alcanzan preto de 529.000, un 6 % máis que no mesmo período do ano anterior.