Sanxenxo contará este verán cun dispositivo de 87 socorristas despregados nas súas dezaoito praias distinguidas con bandeira azul, dentro do operativo de seguridade costeira previsto para a tempada estival.
O dispositivo foi presentado este luns na praia de Montalvo, onde o alcalde, Telmo Martín, fixo entrega simbólica dos distintivos a representantes do servizo de salvamento de cada areal.
Durante o acto, o rexedor destacou o papel destes profesionais na imaxe turística do municipio e na garantía de seguridade para os miles de visitantes que recibe cada verán.
Martín subliñou ademais que a recente incorporación da praia de Pampaído, na parroquia de Dorrón, reforza a posición do municipio dentro do sistema de certificacións de calidade ambiental.
Neste sentido, lembrou que detrás de cada bandeira azul hai un amplo operativo humano integrado por preto de 200 persoas entre servizos de seguridade, limpeza e mantemento.
Sanxenxo mantén actualmente o seu liderado en España como municipio con maior número de bandeiras azuis en praias e sitúase en cuarta posición a nivel mundial.
A estas distincións súmanse tamén as concedidas ao Porto Juan Carlos I, ao Real Club Náutico de Sanxenxo e ao Club Náutico de Portonovo.
O acto contou coa presenza da presidenta de Aviturga, Dulcinea Aguín, así como de membros do goberno local.
Tras a entrega de bandeiras, as autoridades participaron no primeiro izado da tempada en Montalvo, unha praia que mantén este recoñecemento de forma ininterrompida desde o ano 2000.
O servizo de salvamento funcionará en horario de 12.00 a 20.00 horas na maioría dos areais, mentres que en Silgar ampliarase media hora, desde as 11.30 até as 20.30, debido á elevada afluencia de bañistas.
Os postos de vixilancia estarán equipados con material sanitario e de rescate, incluíndo desfibriladores, osíxeno e mochilas de emerxencia.
Ademais, dúas embarcacións tipo zodiac realizarán tarefas de supervisión do litoral entre A Granxa e A Lanzada.
