Nun estado "impecable" quere o Concello de Sanxenxo que estean as súas praias para a Semana Santa. Para iso acaban de recibir o reforzo da máquina limpa praias cedida temporalmente pola Deputación que permite acelerar durante estes días o operativo de limpeza que a Concellería de Medio Ambiente está a desenvolver desde hai dúas semanas.
E é que o Concello de Sanxenxo, que durante todo o ano destina unha brigada integrada por cinco operarios ao mantemento das praias, xa reforzou este dispositivo coa incorporación doutros seis traballadores, contratados a través do Plan Concellos e que integrarán o persoal durante un semestre.
O Concello de Sanxenxo dispón dun tractor, permanentemente destinado ás praias, e dúas máquinas coas que a brigada se encarga de retirar os diferentes residuos que chegan ata a area, que se intensifican en xornadas de mareas vivas.
"Durante todo o inverno temos operarios destinados a este fin, xa que calquera día de sol as nosas praias poden ter visitantes", explica a edil de Medio Ambiente, Coral González-Haba.
A brigada municipal comezou polas praias máis urbanas, como A Panadeira e Silgar, para desprazarse tamén a Areas, Baltar, Montalvo, Pragueira e Major.