A tempada de festas parroquiais está aínda lonxe, pero o Concello de Sanxenxo xa prepara os fondos para colaborar coas comisións de festas e facilitar a organización destes eventos tan importantes para os veciños. O orzamento que repartirá entre as dez organizacións beneficiarias destas axudas ascende a 52.700 euros.
Explican desde a concellería de Cultura que a maior parte das agrupacións destina o diñeiro recibido ao financiamento de fogos artificiais, contratación de orquestras, agrupacións folclóricas ou charangas. Son as comisións as que deben facer chegar unha previsión de gastos ao Concello que logo deberán xustificar coa presentación de facturas.
Ademais de colaborar no financiamento, o Concello asume tamén os gastos derivados das montaxes de escenarios ou da limpeza. Con esta actuación, o goberno local quere recoñecer e poñer en valor o traballo que realizan as comisións de festas para seguir mantendo os costumes e celebracións de cada parroquia.
Excluídas desta iniciativa quedan a organización das festas de Portonovo e Sanxenxo que, pola súa magnitude e duración, contan con partidas específicas no orzamento do Concello.