Coa conclusión do ano terminará tamén a cuarta edición do Programa Integrado de Emprego no que participan os Concellos de Cuntis, Caldas, Portas, Barro e Moraña. Unha iniciativa que está financiada pola Consellería de Emprego e Igualdade da Xunta.
Durante estas catro anualidades ata 345 persoas en situación de demanda de emprego beneficiáronse da formación para a inserción en diferentes especialidades que ofrece este Programa. O balance da iniciativa considérase satisfactorio xa que a inserción laboral conseguida oscila entre o 40 e o 57% entre os seus beneficiarios.
Das catro anualidades, o exercicio de 2019 foi o que derivou en máis empregos, co 57%; mentres que este ano corrente resultou o menos favorable quedándose no 40%. O alcalde de Cuntis, Manuel Campos, apuntaba que "o proxecto é moi positivo tal e como demostran as altas cifras de inserción e a pesar das circunstancias tan difíciles ás que nos enfrontamos debido á covid-19 neste último ano".
Ademais de accións formativas transversais e especializadas, o Programa inclúe prácticas laborais en empresas de diferentes sectores e situadas nesta comarca. A intención que manifestou o alcalde de Cuntis é a de continuar en próximas edicións con este tipo de programas.