Un total de seis empresas optan á organización da feira de verán de Portonovo. Trátase de Sonomobel, Target Eventos Especiales, Organización de ferias y eventos Ramigar, Promociones y Producción de Ferias, Produciones Zona Chan e Maderia Arquitectura e Deseño.
O goberno local a través da empresa municipal Insua Sanxenxo busca con este concurso "un evento de interese turístico de calidade que recree a temática mariñeira aproveitando a idiosincrasia e tradición da vila".
Está prevista a instalación de entre 70 e 80 casetas cunha superficie de ocupación de 720 metros cadrados aproximadamente desde finais de xuño ata o 1 de setembro.
A proposta de venda será variada e de carácter internacional, desde complementos ata artigos téxtiles, pero sempre respondendo a un estándar de calidade. En todo caso quedan excluídos do ámbito deste mercado os postos de carácter alimentario, sen que poidan ocuparse casetas destinadas á venda ou comercialización de calquera produto alimenticio ou bebidas.
O adxudicatario deberá abonar a Insua Sanxenxo pola autorización para a organización e xestión do mercado de Portonovo un canon mínimo de 98.000 euros máis IVE, sen prexuízo das melloras que poidan ofertarse, así como o pertinente canon a Costas.
Sanxenxo acollerá tamén este ano, por primeira vez, unha feira de venda polo miúdo de produtos artesanais, entendendo como tales os bens e produtos de autor singulares pola súa orixe, nos que a intervención persoal sexa determinante no proceso de elaboración e acabado cuxo resultado sexa un produto final de factura individualizada.
A duración proposta abarca desde o 15 de xullo e ata o 9 de setembro e a Praza de Fonte de Ramos deberá dotarse dun sistema de sombra.