Tras as obras de emerxencia realizadas en agosto, o vindeiro martes darán comezo os traballos para solucionar de maneira definitiva o afundimento da rúa José Malvar, provocado polo mal estado da canalización do río Valdecorvos.
Para que as obras teñan un "impacto mínimo" no tráfico, anunciou o edil de Obras, Demetrio Gómez, esta actuación executarase en tres fases ao longo de seis semanas.
O tubo de aceiro corrugado que serve como canalización do río será substituído por unha estrutura de formigón armado, moito máis resistente e de maior calidade.
A primeira fase das obras supoñerá a substitución deste tubo no carril de subida cara a Doce de novembro. Abrirase unha gabia de 10,76 metros e a circulación en ambos os sentidos manterase polo outro carril. Prohibirase o paso do tráfico pesado de máis de 10 toneladas.
Ademais, os autobuses terán que baixar pola rúa Casimiro Gómez.
A parte central de José Malvar pecharase nunha segunda fase, na que se abrirá unha gabia de 11,71 metros. O tráfico rodado e peonil poderase seguir facendo por ambos os lados da parte escavada, onde seguirán traballando os operarios.
Por último, abrirase unha gabia de 11,50 metros no carril de baixada cara á ría. Neste caso, a circulación volverá a desviarse polo outro carril que permanecerá aberto.
As últimas dúas semanas de obras reservaranse para a substitución de diversas pezas de formigón e a pavimentación e asfaltado da rúa.
Estes traballos teñen un orzamento de 106.000 euros.
Mentres duren estas obras, desde o Concello piden aos cidadáns que, na medida do posible, eviten circular por esta rúa. "É complicado, sabémolo", recoñeceu Demetrio Gómez.