O Concello de Soutomaior vaise mergullar este ano nunha semana enteira de terror e diversión coa celebración do Samaín entre o domingo 26 de outubro e o domingo 2 de novembro.
O alcalde, Manu Lourenzo, e a concelleira de Promoción Económica, Hostalería e Comercio, Rosana Comesaña, presentaron a programación animando a toda a poboación a participar nesta "celebración tradicional" e na tarde-noite "máxica, misteriosa e apaixoante" do propio día 31 de outubro.
A programación, pensada para todos os públicos, terá a primeira actividade o 26 de outubro cun obradoiro de cabazas na Finca Cafexo-Massó. Está destinado a toda a familia.
É precisa inscrición previa. Será en liña dende este venres, 17 de outubro, ás 9:30 horas en https://soutomaior.gal/actividades/.
O xoves 30 de outubro continúa a programación con Noctámbulas, unha edición de especial de Samaín con acampada e almorzo na Casa da Cultura Rexina Míguez Noval.
A cita está destinada á mocidade a partir de 12 anos. Será un gran xogo de probas físicas, de lóxica, creativas, de enxeño e en equipo para completar o calendario Celta no que non van faltar os espíritus, as pantasmas, os calacús e moitas outras sorpresas.
As persoas inscritas deberán levar a cea, saco de durmir e esterilla; e últiles persoais para pasar a noite. A actividade é de balde e tamén precisa inscrición previa en liña.
O día grande da celebración será o venres, 31 de outubro. A actividade comezará ás 17:45 horas na Praza de Cima de Vila cun obradoiro de lanternas araña e maquillaxe.
A partir das 19:00 horas dará comezo nesa mesma praza a Noite de Ánimas, coa animación a cargo Troula Animación e o seu espectáculo 'Subumdra', un pasarrúas que se iniciará no cruce de Praza de Cima de Vila e percorrerá a avenida Xosé Solla para rematar en Talo Río.
A festa continuará en Talo Río a partir das 20:30 co tren asador de castañas con degustación de balde. Haberá ambientación interactiva, coa zona convertida en A Casa da Escuridade, e tamén música, co espectáculo 'Esqueletes bailade'.
O sábado 1 de novembro a festa trasladarase ao Multiúsos de Arcade co 'Escape Room Especial Samaín. Aldea Labrega'. Haberá 2 salas, unha para nenas e nenos de 3 a 7 anos e outra para nenas e nenos a partir de 8 anos ás 17:00, 17:30, 18:00, 18:30 e 19:00. Precísase inscrición previa.
O sábado tamén aterrará no Multiúsos, a partir das 20:00 horas, un Maratón de Cinema de Terror, coa proxección de Cazafantasmas: imperio helado e de El Resplandor. Haberá flocos de millo de balde nos descansos de cada película.
O domingo 2 de novembro a Finca Cafexo-Massó acollerá o espace room 'Quen ten cu ten medo'. É unha cita destinada a público adulto, para maiores de 14 anos, de balde e cun único pase ás 18:30 horas. Precisa inscrición previa.
Engade Pontevedra Viva como fonte preferida de Google de balde
Mantente informado coas últimas noticias de actualidade.