Sanxenxo convértese no epicentro da festa cunha intensa programación de Entroido que comezará o 3 de marzo e culminará o 9 de marzo cun único desfile e concurso.
Nesta xornada final, a comitiva percorrerá desde o Paseo de Silgar, no cruzamento con Avenida Luís Rocafort, ata o porto de Portonovo, onde se repartirán un total de 10.830 euros en premios repartidos en tres categorías.
A axenda festiva iníciase o 3 de marzo no Pazo Emilia Pardo Bazán, onde os máis pequenos, de entre 3 e 12 anos, gozarán dos Obradoiros de Entroido en horario de 8 a 15 horas.
Ese mesmo día, ás 18:30 na Praza Pascual Veiga, celebrarase unha mostra do Entroido de Galicia, organizada en colaboración coa Asociación Cultural Abiñadoira.
O martes 4, o barrio de Arra transformarase en epicentro do Entroido, cunha xornada de xogos, inchables, sorteos e música en directo no campo de festas, resultado da colaboración entre a Asociación Cultural San Cayetano de Arra, o Concello e outros colectivos.
O mércores 5, Portonovo acollerá o Enterro da Sardiña ás 20.00 horas, mentres que o 7 de marzo, o Colectivo Veciñal Os Cabritos ofrecerá en Vilalonga o Enterro da Cabra, ás 20:30 horas.
Ese mesmo día, no edificio de Usos Múltiples de Portonovo, está previsto o Espectáculo de Parodias a partir das 21:30 horas, con Silvia Dorrón á fronte e a participación humorística dos veciños.
A actividade premiará con 200 euros á mellor interpretación, sumándose un accésit de 50 euros.
O 8 de marzo, Portonovo celebra a X Festa do Jato, unha xornada continua de actividades e sorpresas organizadas pola Asociación Rúa dos Viños de Portonovo.
A xornada final do Entroido celébrase o 9 de marzo, a partir das 16.00 horas, cando o Desfile Infantil e Adulto percorrerá as rúas de Sanxenxo. Os participantes competirán en tres modalidades:
-
Modalidade Infantil
• Categoría Individual ou Parella: 1º premio 150 euros, 2º 100 euros, 3º 80 euros.
• Categoría Grupo: 1º premio 500 euros, 2º 300 euros, 3º 200 euros. -
Modalidade Fantasía (máis de 20 compoñentes)
• 1º premio: 1.700 euros, 2º: 900 euros, 3º: 600 euros. -
Modalidade Adultos
• Categoría Individual ou Parella: 1º premio 300 euros, 2º 200 euros, 3º 150 euros.
• Categoría Grupo até 20 compoñentes: 1º premio 800 euros, 2º 400 euros, 3º 300 euros.
• Categoría Grupo máis de 20 compoñentes: 1º premio 2.200 euros, 2º premio 1.200 euros.
A inscrición para o concurso é gratuíta e poderase realizar até o 6 de marzo a través da sede electrónica de O.A. Terra de Sanxenxo ou no rexistro municipal.