En Cuntis, un municipio afeito a lidar con inundacións, recoñecen que as choivas que está a provocar este luns a borrasca Joseph puxéronlles nunha situación "límite".
O caudal do río Gallo, que pasa polo centro do municipio, comezou a desbordarse e provocou as primeiras inundacións na zona.
O alcalde de Cuntis, Manuel Campos, que segue desde primeira hora a evolución do temporal, explica que a situación se foi "complicando" co paso das horas.
Á primeira hora da mañá, os veciños comezaron a retirar aveños das súas vivendas, sobre todo na zona que atravesa o Regueiro de Calvos, un dos afluentes do río Gallo.
O servizo municipal de emerxencias, pola súa banda, está a responder ás múltiples incidencias que está a causar esta borrasca e centraron a súa atención no caudal do río.
Entre outros puntos, estes traballos están a intensificarse na Rúa Bernardo Sagasta, na Rúa da Presiña e na Circunvalación Don Aurelio.
Ante esta situación, desde o Concello de Cuntis quixeron facer un chamamento á responsabilidade e pediron aos veciños que teñan "máxima prudencia".
Sosteñen que, cos medios que ten o municipio, o servizo de emerxencias e os membros de Protección Civil "non poden asegurar o bo estado das vías nin a seguridade na circulación" das zonas afectadas.
Campos reclamou "encarecidamente" que se evite calquera desprazamento "que non sexa de vital necesidade" e que os cidadáns non se acheguen ao río, ás pontes ou aos paseos.
"A situación é de risco extremo e moi cambiante", reiterou o alcalde, que pediu aos cidadáns que "non poñades en perigo a vosa vida nin a dos membros do servizo de emerxencia expóndovos a riscos innecesarios".
O rexedor entende que ante o estado "crítico" do municipio necesítase a colaboración veciñal para "evitar desgrazas", recomendando a todos que "queden na casa".
Para a xornada de mañá martes, o Concello subliña que non poderán garantir a seguridade das estradas, especialmente pensando no transporte escolar, polo que instan á Xunta a suspender a actividade lectiva.
Ademais, reclaman ao goberno galego que considere declarar o nivel 2 de emerxencia en todas as zonas afectadas ou, polo menos, no que respecta a todo o municipio termal.