O brote de covid-19 na residencia de maiores Soremay está a piques de estar totalmente controlado. Nas últimas 24 horas foron dados de alta trece usuarios e dous dos seus traballadores.
Así o confirmou a Consellería de Política Social, que informa que continúan coa infección activa dúas dos maiores residentes neste centro pontevedrés e catro dos traballadores que se contaxiaron.
Neste brote, que chegou a acumular ata 61 positivos entre usuarios e traballadores, faleceron seis persoas.
Esta, en todo caso, non é a única residencia da área de Pontevedra onde se rexistran positivos por coronavirus.
Segundo o balance publicado pola Consellería de Sanidade, na residencia de Vilaboa hai dez usuarios con covid-19, tras as dúas altas que se rexistraron desde onte, e seis traballadores.
Ademais, tamén seguen contaxiados oito traballadores da residencia DomusVi de Ribadumia.