O grupo municipal do PSdeG-PSOE de Poio propón a creación dunha conexión viaria no lugar de Coruxa, mediante unha rotonda na PO-308, como solución para facilitar o acceso ao futuro centro de saúde e desbloquear un proxecto que, segundo denuncian, permanece paralizado.
A iniciativa socialista busca habilitar un acceso directo aos terreos previstos para o equipamento sanitario sen pasar pola Canteira.
Ademáis, destacan que este vial melloraría as comunicacións da zona norte de Campelo e dos lugares do Castelo, Albar e Liñares.
O custo estimado da actuación sitúase arredor dos 500.000 euros.
O portavoz do grupo municipal, Gregorio Agís, critica a falta de avances no proxecto e acusa ao goberno local de ausencia de impulso político.
Sinala que, mentres noutros concellos da contorna se executan centros de saúde, en Poio o proxecto continúa sen desenvolverse desde a chegada do actual alcalde.
Ademais da mellora do acceso ao centro sanitario, os socialistas consideran que esta actuación permitiría ordenar a mobilidade da contorna e reforzar a seguridade viaria nun punto que presentan como complexo pola súa configuración actual.
O PSdeG-PSOE insiste en que o centro de saúde debe ser unha prioridade e reclama á Xunta e ao goberno local que impulsen a súa execución, ao entender que se trata dun equipamento necesario para a poboación de Poio.
Resposta do goberno local
Desde o goberno local "desafían" ao grupo municipal do PSOE a que presenten unha empresa que estea disposta a executar o acceso á parcela nas Rochas pola contía económica que eles mesmos indican. No caso de conseguilo, comprométense a licitar a obra no prazo dun mes.
Din que resulta sorprendente que un partido con experiencia de goberno presente propostas sen contar previamente coa dispoñibilidade dos terreos e sen ter en conta as condicións técnicas reais da zona, con abundante presencia de rocha que esixe realizar voladuras, cuestións que encarecen e condicionan de maneira importante a actuación.