O Concello de Soutomaior estreará o próximo mes de xuño a nova aula de estudo que estará aberta de de 07:00 a 01:00 horas durante os 365 días do ano.
O alcalde Manu Lourenzo, e a concelleira de Promoción Económica, Rosana Comesaña, visitaron neste xoves a instalación localizada na Antiga Escola de Romariz (rúa Romariz s/n) coa que pretenden dar resposta a unha "demanda histórica" da mocidade e o alumnado do municipio.
Estará equipada con 18 postos de estudo e contará con conexión wifi, baños, zona de descanso e acceso independente ao resto da instalación.
Tal e como indicou o rexedor, "queremos que todos os veciños e veciñas teñan acceso a espazos dignos, tranquilos e adaptados para estudar e formarse".
Este servizo está dirixido ás persoas maiores de 16 anos empadroadas no Concello de Soutomaior que estean a realizar estudos regrados ou non regrados. No caso de menores de idade, será necesaria autorización da persoa titora legal.
O acceso á aula realizarase mediante un código persoal e intransferible facilitado polo Concello unha vez presentada e aprobada a solicitude correspondente. Este sistema está pensado para favorecer a autogestión do espazo por parte das persoas usuarias e garantir a seguridade das instalacións.
O espazo conta cun sistema de videovixilancia conectado en tempo real coa Policía Local de Soutomaior e coa empresa de seguridade encargada do servizo, e será revisado periodicamente por persoal autorizado para comprobar o seu correcto funcionamento e o cumprimento das normas.
Manu Lourenzo tamén sinalou que "investir en educación e en espazos públicos de calidade é investir no futuro de Soutomaior", á vez que engadiu que a cidadanía "merece contar cun lugar acomodado no que preparar exames, traballos e oposicións en boas condicións".
As solicitudes deben presentarse a través da sede electrónica municipal.
Engade Pontevedra Viva como fonte preferida de Google de balde
Mantente informado coas últimas noticias de actualidade.