O Concello de Soutomaior vén de dar un novo paso na tramitación do futuro Ecoparque Empresarial, unha iniciativa chamada a converterse nun dos principais motores económicos do municipio nas vindeiras décadas.
O proxecto obtivo xa a aprobación inicial, un avance que desde o goberno local consideran decisivo para impulsar a implantación empresarial na zona.
O futuro parque situarase na contorna da Montesiña, un espazo de conexión entre Arcade e Soutomaior que experimentará unha importante transformación urbanística coa creación desta nova área industrial.
Segundo explicou o executivo municipal, o ecoparque terá capacidade para acoller máis de 40 empresas, respondendo así á crecente demanda detectada nos últimos anos.
O alcalde, Manu Lourenzo, destacou que desde o anuncio da iniciativa numerosas compañías xa trasladaron o seu interese por instalarse no municipio.
O rexedor definiu o proxecto como "un dos máis importantes das últimas décadas" para Soutomaior e subliñou que permitirá dotar ao concello dunha infraestrutura empresarial moderna e sustentable.
A actuación contaba previamente coa autorización ambiental da Xunta e incorpora tamén incentivos fiscais destinados a favorecer a chegada de novas empresas, con bonificacións en impostos como o IBI, o IAE e o ICIO.
O desenvolvemento do ecoparque realizarase mediante un sistema de cooperación e, ademais do impacto económico previsto, o goberno local considera que contribuirá a reforzar a conexión entre as dúas parroquias do municipio e a incrementar o valor estratéxico de Soutomaior dentro da comarca.