O Recinto Feiral de Pontevedra acollerá a partir do próximo venres 1 de febreiro unha nova edición de Stock Pontevedra.
A feira de oportunidades impulsada polo Centro Comercial Urbano Zona Monumental contará un ano máis cun cheo total en canto a expositores, con preto de 70 empresas confirmadas.
Os vendedores ofrecerán durante tres días un amplo e variado catálogo de produtos de diferentes sectores: téxtil (moda home, muller, íntima ou infantil), peletería, complementos, calzado, decoración, antigüidades, deportes, fogar e óptica, entre outros.
A décimo sexta edición de Stock Pontevedra contará cun horario de 11:00 a 21:00 horas desde o venres día 1 de febreiro ata o domingo día 3, cun prezo de entrada de 1,50 euros.
Do mesmo xeito que en anteriores edicións, ofrecerase servizo de gardería totalmente de balde.