O subdelegado do Goberno en Pontevedra, Abel Losada, entrou, por alusións, na polémica xurdida na política local sobre a non presenza de bandeiras oficiais na balconada da Casa Consistorial da Praza de España tras a súa reforma.
O PP leva desde 2024 reclamando a colocación das insignias e este sábado deu a coñecer que pediu a actuación de Losada e este respondeulle que contactara vía telefónica co alcalde, Miguel Anxo Fernández Lores, para que colocase as bandeiras nun tempo prudencial.
Para a concelleira e senadora do PP Pepa Pardo, Abel Losada incorreu en "abandono de funcións" e, como resposta, fai unha chamada ao entendemento.
Así, realizou un "chamamento ao sentido común" a todas as partes, tanto ao PP polas súas criticas como ao alcalde e o goberno local do BNG, ao que pide "que instale esa bandeira canto antes". O PP pide as de Pontevedra, Galicia e España.
"Como subdelegado do Goberno, practico un estilo de solucionar as cuestións falando", respondeu Losada ás duras críticas do PP.
Para Losada é "fundamental" que si algún tema pode arranxarse con diálogo, "é mellor para todos, é mellor para a política en xeral e é mellor para o país".
Losada explicou que lle trasladou ao goberno local de Pontevedra que se non colocan as bandeiras oficiais "nun tempo prudencial", faranlles un requirimento formal".
Asegura ao Partido Popular de Pontevedra e a Pepa Pardo que "poden estar tranquilos", pois "por suposto, chegado o caso, faríase" ese requirimento.
Nunhas declaracións remitidas aos medios de comunicación este sábado, Losada considera que o PP ten que explicar "se prefire a lea ou que se resolva esta cuestión".
"Honestamente, dáme a sensación de que prefire o ruído e a furia, que é o que os vén caracterizando na súa maneira de facer política nos últimos anos", critico Losada.
En resposta dilles que con el poden contar "para axudar a resolvelo e se pode ser dialogadamente, mellor", pero que "para a lea e o ruído, o Partido Popular bástase só".