Reivindicación do feminismo e lembranza emotiva a Sonia Iglesias no pregón das Festas da Peregrina

As xornalistas Susana Pedreira e Diana López Varela abriron este sábado, nunha mañá solleira, as Festas da Peregrina 2025 cun pregón marcadamente feminista e reivindicativo desde o balcón do Concello de Pontevedra, acompañados por diferentes representantes da corporación local, encabezados polo alcalde Miguel Anxo Fernández Lores.

As impulsoras do foro "As mulleres que opinan son perigosas" fixeron historia ao converterse nas primeiras mulleres en dar o pregón en parella, un feito que elas mesmas destacaron con humor.

"Nunca antes dúas mulleres xuntas foran pregoeiras das mellores festas do mundo que son as Festas da Peregrina. E dúas mulleres xuntas sempre son un perigo, e máis con nove días de festa por diante!", proclamaron ante unha Praza de España ateigada de público.

Durante o seu discurso, as xornalistas mencionaron numerosas parellas de mulleres que lles serviron como referentes: "Jennifer López e Shakira, que learon na Súper Bowl no 2020; Sonia e Selena, que puxeron a bailar a todo un país no verán de 2001; Elisa e Marcela, as primeiras mulleres en casar en España no 1901, e eran galegas!", enumeraron.

A mención a "Thelma e Louise" serviu para introducir unha das mensaxes máis contundentes do pregón. "Grazas, Thelma. Grazas, Louise. Por ensinarnos en 1991, cando nós tiñamos 8 e 5 anos, que un dos maiores tesouros que unha muller pode ter é unha amiga coa que escapar sen rumbo. E grazas tamén por ensinarnos o perigo que corre un home se intenta violar unha amiga", dixeron, para engadir: "Queridas Thelma e Louise: seguimos traballando e sendo perigosas neste 2025 –31 anos despois– para non ter que dicir, coma vós en 1991, 'Ninguén nos vai crer'".

López Varela e Pedreira tamén reivindicaron o seu foro feminista, que leva sete anos celebrándose na cidade: "Que Pontevedra apostara sen complexos por reivindicarse como perigosa e feminista é un impulso inmenso para a igualdade real pola que traballamos, moitas veces cansas de repetir o mesmo, pero sen descanso".

O pregón non esqueceu o carácter feminino da cidade, cunha enumeración de espazos que levan nome de muller: "A nosa Pontevedra é unha cidade da que falamos en feminino: a Peregrina, A Ferrería, a alameda, A Leña, A Verdura, A Illa das Esculturas...", recordaron, para subliñar tamén que "Amalia Álvarez ten parque, María Victoria Moreno, Josefina Arruti e Virxinia Pereira teñen avenidas, e non esquezades que o Campiño é de Santa María".

LEMBRANZA A SONIA IGLESIAS

Nun dos momentos máis solemnes, as pregoeiras fixeron unha pausa para lembrar as vítimas da violencia machista: "Neste balcón estamos moitas pero non estamos todas, nunca en ningunha festa estamos todas, faltan as 1.318 mulleres asasinadas desde 2003, ano no que comezaron a contabilizarse os crimes machistas nas estatísticas oficiais do Estado. 24 foron asasinadas no que vai de 2025: dos 22 asasinos, 17 eran parellas das vítimas e 7 eran exparellas ou estaban en fase de ruptura".

A mención especial a Sonia Iglesias, desaparecida en Pontevedra hai 15 anos, foi o momento máis emotivo do pregón. Diana López lembrouna con emoción e saltáronselle as bágoas ao dicir que "en Pontevedra nunca estamos todas porque desde hai 15 anos falta Sonia Iglesias. Non te esquecemos, Sonia".

As xornalistas remataron o seu discurso cun chamamento a gozar das festas, pero tamén a seguir traballando por unha sociedade máis xusta: "Seguiremos sendo perigosas ata vivir nunha sociedade libre de perigo para cada unha das mulleres que estamos aquí e en calquera lugar do mundo.

Ata que cada día das Festas da Peregrina, sexa a hora que sexa, poidamos volver soas, tranquilas e seguras a casa. E que na nosa casa sigamos estando seguras. Esas son as festas que soñamos!".

Tras o tradicional "Que vivan as Festas da Peregrina! Que viva Pontevedra!", o chupinazo marcou o inicio oficial das celebracións, que se prolongarán durante os vindeiros días con múltiples actividades para todos os públicos.