A actuación de emerxencia impulsada no Teatro Principal tras a caída parcial do seu falso teito terá que ser máis profunda do planeado inicialmente.
Tras a retirada da escaiola, os técnicos acreditaron numerosas deficiencias en toda a súa estrutura, polo que o teito deberá ser reconstruído na súa totalidade.
Esta revisión en profundidade acreditou, segundo o edil de cultura, Demetrio Gómez, que o teito do emblemático teatro pontevedrés, despois de corenta anos, "xa non cumpría coas condicións de seguridade que debía ter".
"Fixemos ben en desmontalo todo", asegurou este venres o representante municipal, porque a escaiola estaba moi deteriorada noutros puntos do teito que cubría o patio de butacas do teatro.
Algunhas das súas ancoraxes estaban soltas ou carecían da suxeición axeitada, resumiu Gómez tras a revisión realizada ás instalacións, que lembrou que a escaiola é un material ríxido "que cede sen avisar".
Ademais, ao realizar probas de carga os técnicos detectaron que os traveseiros brancos de madeira do teito, que cumprían funcións acústicas, tiñan problemas similares. Só estaban cravados á estrutura sen ningún tipo de material de apoio.
Estes elementos, do mesmo xeito que o resto da estrutura de madeira que os soportaban, son anteriores a 2006 e, por tanto, xa non cumpría tampouco co código técnico vixente en materia de edificacións.
Ante toda esta revisión en profundidade, o Concello tomou a decisión de reconstruír todo o teito para que cumpra "con absolutamente todas as normativas de seguridade", segundo indicou o responsable municipal de cultura.
O novo teito xa non será de escaiola senón que se reconstruirá en madeira, o que a xuízo dos expertos permitirá mellorar "significativamente" a acústica do recinto.
Esta actuación incluirá tamén a substitución de todas as estruturas ocultas que están danadas, novos reflectores de son e a renovación íntegra de toda a iluminación, que pasará a ser de tecnoloxía LED de baixo consumo.
Estes traballos engadidos suporán un incremento no orzamento previsto para estas obras de emerxencia, inicialmente uns 250.000 euros. Este sobrecusto, segundo Demetrio Gómez, "aínda non se pode determinar".
O Concello confía en que este contratempo non altere os plans para a reapertura do teatro, fixada para o mes de outubro, aínda que recoñeceu que dependerá da dispoñibilidade da empresa contratada como provedora da madeira.
