"Temos unha agresión cada dous días a un policía nacional", aseguran desde CEP

A entrada peonil da Comisaría Provincial de Pontevedra, situada provisionalmente na rúa Cruz Gallástegui debido ás obras no edificio policial, albergou este martes unha concentración convocada pola Confederación Española de Policía (CEP).

A mobilización, ambientada con música rockeira reivindicativa e unha caveira, contou co respaldo das concelleiras do Partido Popular local Silvia Junco, Beatriz Rey e a tamén senadora Pepa Pardo.

Os representantes sindicais expuxeron as carencias materiais e humanas que afectan o persoal do Corpo Nacional de Policía na provincia e criticaron a xestión do Ministerio do Interior.

O coordinador da CEP en Galicia, Agustín Vigo, detallou que, de acordo cos datos oficiais de criminalidade do Ministerio do Interior, os delitos graves e menos graves de lesións e rifa tumultuaria vencellados á violencia nas rúas experimentaron un aumento do 192.85% na cidade de Pontevedra entre os anos 2018 e 2025.

A estadística desglosada polo sindicato reflicte unha evolución que pasou de 14 feitos rexistrados en 2018 a 41 no ano 2025, alcanzando o máximo da serie en 2024 con 46 casos.

Engadiu, ademais, que "no caso de Pontevedra, temos unha agresión cada dous días a un policía nacional, aproximadamente".

A organización sindical expuxo que a seguridade cidadá vese afectada por factores de índole municipal e estrutural. Vigo criticou de forma expresa a instalación de elementos de mobiliario urbano por parte do Concello de Pontevedra.

"É o único sitio de España que vemos onde o concello coloca os bolardos tamén para obstaculizar o labor da policía", manifestou o coordinador, argumentando que estes dispositivos impiden un acceso rápido ante as chamadas de intervención.

A CEP cualificou as dependencias da actual Comisaría Provincial como "inadecuadas" para as necesidades dunha capital de provincia.

Aínda que existe unha previsión orzamentaria para a construción dunha nova sede a un prazo de oito anos, a organización considera inviable manter as actuais instalacións por non cumprir as condicións de habitabilidade e servizo que require a cidadanía. "É gastar diñeiro ao parvo", apuntaba o representante sindical.

Outra das demandas centrais da mobilización é a implantación da Unidade de Prevención e Reacción (UPR) en Pontevedra, un servizo que xa opera no resto das principais cidades galegas como Santiago de Compostela, A Coruña, Lugo, Ourense e Vigo.

Segundo explicou o portavoz sindical, esta unidade multifuncional resulta imprescindible para a cobertura de grandes eventos e para o reforzo da seguridade cidadá ordinaria, paliando a escaseza de vehículos patrulla na vía pública.

A CEP achaca a falta de dotación nas rúas a que os policías nacionais deben asumir tarefas administrativas debido á diminución do persoal dos corpos xerais dentro da comisaría.

Javier Martínez, portavoz da CEP en Galicia, vincula a repunta delituosa ao incremento dos puntos de venda de substancias estupefacientes e contrapón a escaseza de medios locais co investimento destinado ás policías autonómicas de Cataluña, País Vasco e Navarra.

Baseándose nos datos oficiais da Intervención Xeral da Administración do Estado (IGAE), Martínez sinala que o financiamento para estes corpos autonómicos ascendeu a 1.512 millóns de euros entre 2019 e novembro de 2024, mentres que as comisarías do Estado en Galicia sofren falta de recursos.

PROFESIÓN DE RISCO

Por último, o sindicato censurou que o Goberno central teña rexeitado ata en 71 ocasións a declaración da Policía Nacional e a Garda Civil como profesión de risco, unha condición que si posúen outros colectivos laborais.

"Algo incrible, porque temos que un bombeiro é profesión de risco, e está ben, pero temos que un cantante é profesión de risco, e non nos parece mal. Temos que unha azafata é profesión de risco, parécenos ben. Si todos eles son profesión de risco e non temos nada que dicir en contra, como é posible que nós non o sexamos?", expuxo Agustín Vigo.

Ante a falta de avances nas negociacións co ministro do Interior, Fernando Grande-Marlaska, de quen volveron solicitar a dimisión, a CEP trasladou o debate ás institucións da Unión Europea para impulsar unha directiva comunitaria que regule tanto a protección xurídica dos axentes como a creación da figura do eurodelito para os ataques ás forzas de seguridade.

"FANTASÍA DISTÓPICA"

O subdelegado do Goberno en Pontevedra, Abel Losada, expresou a súa profunda perplexidade ante o comunicado e as declaracións realizadas pola Confederación Española de Policía (CEP).

Fronte a estas acusacións de "incremento salvaxe da violencia nas rúas", Losada defendeu con firmeza a situación da seguridade cidadá e criticou duramente a postura da organización sindical.

"Paréceme moi triste que un sindicato policial fale nestes termos de seguridade cidadá, nunha cidade que é extraordinariamente segura", manifestou o subdelegado.

"Hai máis policías que nunca", afirmou indicando que era grazas ás ofertas históricas de emprego público do Executivo central, segundo apuntou, que serviron para "reverter os recortes sistemáticos do Goberno anterior".

Para refutar as porcentaxes presentadas pola CEP, o representante do Goberno recorreu ao balance oficial de criminalidade. Segundo detallou, Pontevedra pechou o ano 2025 cun total de 2.353 delitos convencionais denunciados, o que supón un descenso do 6% en comparación cos 2.515 rexistrados en 2019.

"Todo o contrario do que sucede na maior parte do mundo, aquí a delincuencia está en continuo descenso", asegurou Losada.

O subdelegado tamén desglosou os datos específicos relativos aos delitos de lesións e liortas tumultuarias, sinalando que a cidade do Lérez pechou o pasado exercicio con 41 denuncias, unha cifra sensiblemente inferior á doutras urbes galegas como Vigo (94), Santiago (82), Lugo (53) ou Ferrol (44), e moi afastada das máis de 140 rexistradas en Ourense e A Coruña.

Ante este panorama, Abel Losada fixo un chamamento público á responsabilidade no debate sobre a seguridade viaria e cidadá: "Pediría, ante todo, un pouco de rigor, un pouco menos de fantasía distópica e un respecto para o traballo das Forzas e Corpos de Seguridade do Estado".

Por último, o subdelegado concluíu recomendando "realismo aos sindicatos, porque é a única maneira de defender os intereses dos traballadores".