A Garda Civil detivo un veciño de Cambados que na mañá deste luns tentou entrar á forza nun colexio, encerellouse cun axente da Policía Local que tentou impedilo e ambos os dous acabaron no solo, o policía cunha perna rota.
Segundo a información facilitada pola Garda Civil, o home foi detido por atentado a axente da autoridade e logo foi trasladao a un centro hospitalario para recibir asistencia médica.
Este home reside no centro de Cambados e este luns, por causas que se descoñecen, saíu á rúa moi alterado, gritando e pedindo socorro.
Todo apunta a que se atopaba baixo os efectos dalgunha sustancia estupefaciente, segundo fontes oficiais.
Nun momento dado, tentou entrar no colexio de Corbillón e o director do centro solicitou axuda á Policía Local.
Axentes municipais desprazáronse até o centro e, dado que o home persistía na súa intención de entrar, tentaron impedilo.
Nun momento dado, este home e un policía acabaron no chan e o axente rompeu unha perna.
Nese momento, chegou ao lugar unha patrulla da Garda Civil porque a Policía Local pedira reforzos e procederon á detención.