O comité organizador do Congreso Internacional Camellia 2014 que encabeza a presidenta da Sociedade Española da Camelia, Carmen Salinero, mantivo unha reunión no edificio adminitrativo da Deputación Provincial para analizar aspectos do evento que se celebrará entre o 11 e o 15 de marzo en Pontevedra.
A deputada provincial, Begoña Estévez, sinalou durante este encontro que será a primeira vez que se celebra en España este Congreso e que o principal obxectivo é atraer un novo tipo de turista que centra o seu interese na flor da camelia. Numerosos expositores inscribíronse para acudir a este Congreso que se desenvolverá no Centro Social de Novacaixagalicia. Polo momento, o país que trasladará máis participantes é Australia con 30 asistentes, seguido por Estados Unidos.
Durante as cinco xornadas en que se desenvolverá o Congreso están previstas, entre outras actividades, unha visita ao Pazo de Rubiáns, un percorrido pola Estación Fitopatolóxica de Areeiro e un paseo polo Castelo de Soutomaior.
Esta cita contará cun precongreso do 6 o 10 de marzo que terá lugar en Porto e no norte de Portugal, ademais dun postcongreso que se celebrará, do 16 ao 22 de marzo, en distintos puntos de Galicia cunha importante actividade na zona das Rías Baixas.