A gastronomía galega mostrará toda a súa creatividade no certame Sete cidades, sete sabores, co que Turismo de Galicia quere elixir o mellor cociñeiro de tapas. Competirá un cociñeiro por cada unha das sete grandes cidades galegas.
Entre eles estará, representando a Pontevedra, Rubén González de El Cafetín de la Alameda. A súa proposta para conseguir o ansiado título é 'Tomatún', a elaboración coa que gañou o último concurso PontedeTapas na súa categoría creativa.
O 'Tomatún' consta dun dado de atún sobre un cremoso elaborado co mesmo peixe, que busca imitar visualmente unha rodiña de tomate.
Complétase cun tomate recheo sobre unha base crocante, feita con auga e po do propio froito.
Os representantes de cada cidade son Álex Martínez e Mar López de Bacelo (Ferrol); José Luis Pardo de Orixe do Campo (Lugo); Paco Gómez de Pulpería Asador La Feira (Ourense) ou Daniel Bastos de La Marciana (Vigo).
Ademais de Rubén González por Pontevedra, tamén participarán Alejandro Ferreiro de O Sendeiro (Santiago de Compostela) e Vicenzo Amaddeo de Ama Italiana Contemporánea (A Coruña).
Os sete cociñeiros competirán por dous galardóns.
Por unha banda, o premio do xurado profesional, que valorará cada tapa segundo a súa complexidade técnica, creatividade, presentación e sabor e, por outra parte, o premio do xurado popular, integrado polos invitados á gala, que utilizará un sistema de televotación.
Sete cidades, sete sabores, organizada pola Xunta de Galicia, é unha iniciativa para atraer a ese visitante que fai escapadas en diferentes épocas do ano, buscando experiencias culinarias, enfocándose na gastronomía local e a cultura relacionada coa comida.
Busca amosar a creatividade da gastronomía galega enmarcando estas experiencias nos recursos turísticos de Ferrol, Lugo, Ourense, Vigo, Pontevedra, Santiago de Compostela e A Coruña, cidades atractivas e dinámicas con historia e cultura propias.