Un cartel "feito na casa" e con estilo tradicional. Así é a imaxe que acompañará este ano á Festa do Lacón con Grelos, que celebrará a súa edición número 27 os días 21 e 22 de febrero.
O deseño, que foi creado polos propios empregados do departamento municipal de Turismo, recolle a "esencia da festa", segundo destaca o alcalde de Cuntis, Manuel Campos: o xantar baixo a carpa, a música das charangas e o lacón como gran protagonista.
"Estamos moi orgullosos de presentar un cartel que é unha mostra do compromiso e do talento dos nosos empregados municipais, que coñecen mellor que ninguén o que significa esta festa para Cuntis", sinalou o rexedor.
Campos explicou que o obxectivo era darlle un "toque distinto" a esta identidade visual, recuperando o formato de debuxo e ilustración.
A organización considera este estilo artístico "transmite mellor a calidez, a proximidade e o ambiente familiar" que se respira baixo a carpa da festa, "fuxindo de imaxes máis artificiais para volver á esencia do artesanal".
O deseño, defenderon os seus creadores, "non deixa nada ao azar".
Así, no centro do cartel destaca a figura dun porco antropomorfo, vestido de etiqueta con traxe e sombreiro. É o representante indiscutible do produto estrela, o lacón, achegando un "toque de humor e solemnidade".
O fondo da ilustración está dominado pola estrutura da carpa, xa que "non é só un escenario, é realmente a esencia da festa", destacan desde o Concello, o lugar "onde reside o verdadeiro ser da convivencia veciñal".
A escena complétase cunha charanga, elemento que "callou moi ben na nosa cultura" e que é vital para a animación, e coas camelias, a flor que enmarca o cartel e lembra a importancia das exposicións que acompañan a gastronomía.
O Concello lembra que esta festa, declarada de interese turístico, é o escaparate máis importante da vila e convida a todos os galegos a achegarse a Cuntis o 21 e 22 de febreiro para gozar do bo xantar e da boa música.