Natalia Viña Lledó, Marisé García Castiñeira e Mariem Filgueira Pérez son tres emprendedoras de Poio que protagonizarán o vindeiro mércores, día 24, a partires das 20.30 horas, a primeira sesión dos faladoiros "A Forza das Mulleres".
Trátase dunha serie de encontros que poderán seguirse por streaming, a través das canles oficiais do Concello de Poio, previa inscrición no correo a [email protected].
Todas elas son integrantes da Asociación de Emprendemento EnPoio. Natalia Viña é a responsable de Fisioterapia Combarro, Marisé García dirixe a Autoescola Arias e Mariem Filgueira impulsa a entidade Sherpa Empresarial.
A Concellería de Igualdade, que dirixe Silvia Díaz organizou esta inciativa no marco dos actos de de conmemoración do Día Internacional da Muller "co obxectivo de compartir experiencias e opinións sobre diferentes cuestións de interese, como poden ser as dificultades que as mulleres atopamos na sociedade patriarcal para o desempeño profesional, a imposibilidade de conciliación ou que significa ser muller nestes tempos de pandemia".
A conversa con estas emprendedoras estará dirixida pola directora do Centro de Información á Muller, Raquel Morales, e a psicóloga do propio CIM, Lidia Fazanes.