Reloxos para fichar rebentados, postos de control bloqueados, desprazamentos de 30 minutos que se prolongan durante máis de dúas horas, actitude negativa, pintadas, boicot e chantaxe son algunhas das situacións que se están vivindo no Parque de Maquinaria, segundo indicou o responsable político deste servizo, Uxío Benítez.
O deputado fixo un "último chamamento á cordura" de cara á reunión que se celebrará este xoves entre os representantes dos traballadores e o goberno provincial.
Con todo as posturas permanecen inmóbiles. Uxío Benítez reiterou que pola súa banda "non hai volta atrás" na súa decisión de reestruturar o Parque de Maquinaria "para que traballe para todos os concellos e non só para os do PP" e acabar coas condicións privilexiadas de 30 funcionarios fronte ao resto das 140 persoas que forman parte deste servizo.
Igualmente desde o sindicato Comisións Obreiras reafirmáronse na súa tese alertando da "privatización" do Parque de Maquinaria. Algo que o deputado do BNG cualifica de "estratexia político sindical" e que enmarca na presente campaña electoral.
Aínda que hai algo no que si coinciden: o mantemento das estradas provinciais está a verse prexudicado durante este tempo.
O xoves ás dez da mañá reuniranse ambas as partes coa intención de falar, xa lles contaremos.
SALÓN DE PLENOS EN OBRAS
Debido ás obras para reparar o tellado do Pazo provincial, este xoves a Deputación celebrará o pleno ordinario deste mes de xuño na sala de Xuntas. Debido ás reducidas dimensións deste espazo, non será posible a asistencia de público, máis aló de cinco ou seis persoas.