Entre os oito pacientes que actualmente se atopan ingresados no Complexo Hospitalario de Pontevedra hai un caso especial. Trátase dun bebé de apenas un mes de vida, que se converteu na persoa máis nova na que se detectou o coronavirus.
Fontes hospitalarias confirmaron a noticia adiantada por Diario de Pontevedra. O menor está ingresado no Hospital Provincial e está baixo vixilancia constante para comprobar a súa evolución.
Atópase illado do resto de pacientes de Pediatría para evitar contaxios, pero a súa evolución está a ser positiva, segundo os exames realizados ata o de agora.
O bebé é un dos 279 casos activos de COVID-19 que ten a área sanitaria de Pontevedra e O Salnés, oito deles hospitalizados e o resto seguindo tratamento nos seus domicilios.