Un novo conxunto escultórico unirase aos xa existentes na cidade de Pontevedra. Estará situado na pasarela de José Adrio Barreiro, entre as rúas Doce de novembro e Loureiro Crespo. Servirá para homenaxear a todos os represaliados pola ditadura o 12 de novembro de 1936. Así o anunciou o voceiro do goberno municipal, Raimundo González, tras a Xunta de Goberno deste luns.
Aprobouse investir uns 60.000 euros na construción desta escultura que busca, sinalan dende o goberno local, perpetuar a memoria dos dez fusilados aquel día e, por extensión, servir de recordo a todos os represaliados.
En concreto, o monumento recordará as figuras do impresor Ramiro Paz Carvajal; o avogado José Adrio Barreiro; os médicos Amancio Caamaño Cimadevila, Telmo Bernárdez Santomé e Luis Poza Pastrana; os mestres Paulo Novás Souto, Germán Adrio Mañá e Benigno Rei Pavón; o xornalista Víctor Casas Rey e o capitán Juan Rico González.
A todos eles se lles dedicou unha rúa hai anos e na súa honra organízase, anualmente, un acto cívico nas inmediacións desta pasarela. Coas obras de reforma integral desta zona, houbo que retirar o muro perimetral e o monolito, que a xeito de monumento recordaba a memoria dos fusilados en 1936. Xa entón, o concelleiro de Urbanismo, Antón Louro, anunciaba que se colocaría un novo conxunto escultórico.
A intención do goberno municipal é que esta escultura poida ser inaugurada o próximo 12 de novembro durante o acto cívico en recordo dos represaliados que se celebrará coincidindo co 78 aniversario destes fusilamentos.