Unha muller de 36 anos foi atacada pola súa exparella a última hora da tarde deste sábado en Monte Porreiro na contorna das rúas Cambria e Alemaña. A vítima foi apuñalada e sufriu un corte no pescozo.
Segundo fontes da Policía Nacional, unha ambulancia trasladouna en estado consciente ata un centro hospitalario para ser atendida da ferida.
O presunto agresor convivía con ela nun piso da urbanización pontevedresa, a pesar de que, na actualidade, xa non eran parella. Ata o lugar desprazáronse patrullas da Policía Nacional.
O home inicialmente fuxiu do lugar e, posteriormente, era detido a uns metros da zona, tras entregarse de maneira voluntaria aos axentes da Policía Nacional. O presunto agresor e a vítima son de nacionalidade colombiana, segundo as mesmas fontes.
Están a investigarse as causas que provocaron o suceso.