A segunda edición do Entroido de Verán de Ponte Caldelas achégase e o goberno local empeza a debullar o programa de actividades previsto.
O gran atractivo será o desfile polas rúas da vila, fixado para o sábado 16 de xuño con saída ás 21:00 horas desde o Paseo da Calzada.
Segundo explicou o goberno local, espérase a presenza dun bo número de grupos de entroido, e de feito confirmaron xa a súa participación cinco comparsas e outros tantos grupos, a pesar de que a inscrición pechará aínda o día 14 de xuño.
Entre as novidades desta edición destaca a creación dun premio para a mellor 'drag queen', cunha dotación de 300 euros para a primeira clasificada, 200 euros para a segunda e 100 euros para a terceira.
Ademais introducirase outra categoría, a do premio ao mellor disfrace do público. A persoa que logre esta distinción obterá 75 euros de recompensa.
A inscrición para participar no desfile do Entroido de Verán pode formalizarse no rexistro do Concello, xa sexa de maneira presencial ou a través da sede electrónica.