A UNED e ENCE unen esforzos para pór en marcha o 'II Plan de Mentorización para emprendedores universitarios'

A UNED en Pontevedra presenta o 'II Plan de Mentorización para Emprendedores e Emprendedoras Universitarias', unha iniciativa co firme propósito de impulsar a creación e consolidación de proxectos empresariais con impacto social, grazas ao financiamento de ENCE a través do seu VI Plan Social para Pontevedra 2025.

A Universidade Nacional de Educación a Distancia (UNED), a través do seu Centro Asociado en Pontevedra, impulsa entre o 11 de maio e o 12 de xuño o II Plan de Mentorización para Emprendedores e Emprendedoras Universitarias, un programa formativo centrado na transformación emprendedora e a economía social, dirixido a estudantes, graduados, investigadores e profesionais interesados en xerar iniciativas que contribúan ao desenvolvemento económico e social.

Este plan forma parte dunha ambiciosa proposta educativa que combina formación teórica, talleres prácticos, o acompañamento de mentores especializados e espazos de networking para fomentar a innovación e a creación de empresas de impacto social con enfoque sostible.

Ao longo de cinco semanas, os participantes explorarán temas clave como aspectos legais do emprendimiento, deseño e formulación de proxectos, xestión financeira, economía social, sustentabilidade empresarial e liderado, entre outros.

COLABORACIÓN ESPECIAL DE ENCE A TRAVÉS DO SEU PLAN SOCIAL

A colaboración de ENCE, empresa comprometida co desenvolvemento sostible e o impulso de iniciativas sociais e económicas en Galicia, foi fundamental para facer realidade esta actividade formativa.

Grazas ao financiamento de ENCE a través do seu VI Plan Social para Pontevedra 2025, centos de mozos emprendedores poderán acceder de forma gratuíta a contidos, recursos e mentores que lles permitirán dar pasos firmes no desenvolvemento das súas ideas e proxectos empresariais.

Desde a UNED sublíñase que este programa non só ofrece ferramentas para a creación e xestión de empresas, senón que tamén promove a xeración de redes de colaboración entre estudantes, expertos e axentes sociais, favorecendo a empregabilidade e o emprendemento de impacto social, aliñado cos obxectivos de desenvolvemento sostible.

A actividade desenvolverase en formato online con posibilidade de asistencia en directo ou en diferido, adaptándose ás necesidades dos participantes. Ademais, espérase que deste plan de mentorización xurda unha lanzadeira de proxectos de economía social da UNED, que permita consolidar iniciativas emprendedoras xurdidas do propio curso.

A UNED e ENCE reafirman con este programa o seu compromiso conxunto coa formación, o emprendemento, a innovación e o desenvolvemento socioeconómico da comunidade universitaria e da contorna galega.