O centro penal da Lama acollerá a partir deste mércores, 25 de xuño, o primeiro dos cursos de verán ofertados pola UNED en Pontevedra.
Trátase do seminario 'Finanzas nun mundo en transformación: falando de diñeiro a escala humana', que analizará como os avances tecnolóxicos, as dinámicas sociais e os cambios económicos redefinen as finanzas persoais e colectivas.
A idea desta acción formativa é ir máis aló das fórmulas tradicionais e descubrir como o diñeiro pode converterse nun medio para mellorar as nosas vidas, tomando decisións conscientes e responsables.
O alumnado aprenderá a aplicar os principios financeiros de maneira que resoen coas realidades cotiás, buscando sempre un equilibrio entre a rendibilidade e o benestar.
O curso vai dirixido a persoas privadas de liberdade e está deseñado para axudarlles a comprender que ter control sobre o seu diñeiro é facelo tamén sobre a súa vida.
Aprenderán como xestionar os seus recursos de maneira eficiente, planificar un futuro con máis oportunidades e como tomar decisións financeiras que non só impacten o seu benestar persoal, senón tamén o da súa comunidade.
O obxectivo é que poidan aplicar os coñecementos adquiridos non só ao contexto da vida diaria, senón tamén para dar pasos cara a unha reinserción exitosa na sociedade.
O mércores 25 de xuño, Montserrat Hernández Solís, profesora contratada doutora da UNED, impartirá e taller 'A educación financeira: Unha ferramenta básica para a inclusión social. Especial atención ás necesidades e requirimentos dos clientes, con aplicación do Test de cuantificación de Lusardi' e a profesora axudante doutora da UNED Ana Tomás López falará sobre 'Principios financeiros básicos e de protección social da poboación estranxeira en España'.
A xornada matinal do xoves, 26 de xuño, comezará cunha conferencia de José F. Hontoria Caballero, enxeñeiro Superior de Telecomunicación, especialista en solucións informáticas de comunicacións, que disertará sobre a ciberseguridad e IA nun mundo en transformación.
Myriam Fernández Nevado, avogada e politóloga, falará sobre 'Cidadanía, Finanzas e Dereitos Humanos no século XXI: A protección, a participación e os riscos na sociedade líquida de dereitos'; Pedro Raúl Montoro Martínez, profesor axudante doutor de Psicoloxía Básica da UNED, pronunciará unha conferencia baixo o título 'Pensando coa carteira. Introdución á Economía Conductual'; e Ricardo Pellón Suárez de Puga, catedrático de Psicoloxía Básica da UNED, falará sobre 'Enraizando as decisións financeiras a través da investigación básica en Psicoloxía'.
O venres, 27 de xuño, haberá unha intervención de Fernando Hernández Fradejas, profesor axudante doutor da UNED, sobre 'As moedas dixitais. Un ataque á liberdade?' e, para terminar, Inmaculada Álvarez, economista e Experta en Administración e Finanzas (xestión sostible), pechará o curso con 'Tecnoloxía Dixital Sostible aplicada á contorna social e laboral'.